Ұстаздық еткен жалықпас

"Дипломмен ауылға" бағдарламасы қабылданып, жастардың игілікті жобасына айналғанына 10 жылдан асты. Осы уақыт ішінде қанша жас маман ауылға келіп, қалаған мамандығымен жұмысқа орналасып, баспаналы болды. Жастарды қолдауға арналған тиімді бастаманың шарапатын көргендердің мемлекетке алғыстан басқа айтары жоқ. Бағдарлама аясында ауданда 2009-2017 жылдары 494 маманға 51860,4 мың теңге көтерме жәрдемақы берілсе, 2010-2018 жылдары 496 маманға 1 163 154,7 мың теңге тұрғын үй сатып алу үшін берілетін бюджеттік кредит ұсынылған. 2019 жылы 65 маманға 246188,0 млн теңге тұрғын үйге несие қаралған. «Дипломмен ауылға» бағдарламасымен баспаналы болған жастар қатарында Мөлдір Райымбаева да бар. Ол аудандық оқушылар үйінде «Медиа» үйірмесінің жетекшісі. Қазақ тілі мен әдебиеті пәнінің І санатты ұстазы жетекшілік ететін үйірме атауы бұған дейін «Жас тілші» деп аталыпты. Жыл сайын жасақталған 12 оқушыға көп алдында тосылмай сөйлеу мәдениеті мен шығарма, мақала, эссе жазуды үйретіп, өз ойын қағазға еркін түсіруге машықтандырады.
Республикалық шығарма байқауларында Ақсұңқар Айдынұлы, Аяулым Ғалымжанқызы, Ақбота Әбдірахман, Фарида Қазбекова, Аяулым Әнуарбек есімді оқушылар үнемі жүлделі орын алып, жас ұстаздың мерейін тасытып жүр. Мөлдір Атабайқызы түрлі жарысқа дарынды шәкірттер дайындағаны үшін бірқатар мақтау қағазымен марапатталған. Жазғы демалыстағы оқушылар уақытын тиімді ұйымдастыруда қызықты шаралар өткізіп, жаз бойы тынымсыз еңбек етіп жүр.
– Ұстаз ретіндегі негізгі ұстанымым – оқушыларды тұлға деп тану, оның пікірімен санасу, кішкентай қуанышын, табысын бағалай білу. Қытай философының: «Маған жай айтсаң – ұмытамын, көрсетсең – есімде сақтаймын, ал өзімді іс-әрекетке қатыстырсаң – үйренемін» деген даналығын бағдаршам еттім. Білуге, ізденуге, үйренуге бейіммін. Шәкірттерімді де соған негіздеймін, – дейді ол.
Жастарға жасалған мүмкіндік көп. Бірақ соны тиімді пайдалана алмай жүргеніміз қаншама. Еліміздің білім беру саласына оңтайлы өзгерістер еніп, түрлі инновациялық жобалар мен бағдарламалар іске асуда. Осыған орай ауылдық жердегі білім беру мекемелеріне баса көңіл аударылуда. «Дипломмен–ауылға» жобасы соның айқын айғағы. Ұстаздық – басқа мамандыққа қарағанда, ең қиын әрі ізгілікті мамандықтың бірі. Бүгінгі жаһандану заманында ұлт­­тық бәсекеге қабілетті болудың басты көрсет­кіші – білім деңгейі. Сондықтан кез келген шәкірттің дарынды, зерек болуы алдымен ұстаздардың білімі мен білігіне байланысты. Осы орайда біз республика, облыс көлемінде үлкен жетістікке қол жеткізіп, дарынды шәкірттер тәрбиелеп жүрген жас маманға шығармашылық өрлеу тілейміз.
Қорыта айтқанда, әрбір оқытушы һакім Абайдың:
Ақырын жүріп анық бас,
Еңбегің кетпес далаға.
Ұстаздық еткен жалықпас,
Үйретуден балаға – атты өнегесін Мөлдір секілді әрдайым жүрегінің түкпірінде ұстаса, өз мамандығының нағыз шебері болары хақ.