Тағамнан уланудың алдын алу

Тағамнан улану – сапасыз немесе дұрыс сақталмаған тағам өнімдерін тұтыну нәтижесінде пайда болатын жұқпалы аурулардың бірі. Әсіресе жаз мезгілінде тағамның тез бұзылуына байланысты улану жағдайлары жиі кездеседі. Улану кезінде адамның жүрегі айну, құсу, іш өту, дене қызуының көтерілуі және әлсіздік сияқты белгілер байқалады.

Тағамнан уланудың негізгі себептері – тағамды дұрыс сақтамау, жеке бас гигиенасын сақтамау және мерзімі өткен өнімдерді пайдалану. Сондықтан күнделікті тұрмыста санитариялық талаптарды сақтау өте маңызды.

Тағамнан уланудың алдын алу үшін:

қолды сабынмен жиі жуу;

жеміс-жидек пен көкөністерді мұқият жуу;

тағам өнімдерінің жарамдылық мерзімін тексеру;

тез бұзылатын тағамдарды тоңазытқышта сақтау;

шикі және дайын тағамдарды бөлек сақтау;

көшеде сатылатын сапасыз тағамдарды тұтынбау қажет.

Сонымен қатар, ет, балық, жұмыртқа өнімдерін толық термиялық өңдеуден өткізу қажет. Таза ауыз су пайдалану да тағамнан уланудың алдын алуда маңызды рөл атқарады.

Улану белгілері байқалған жағдайда өздігінен ем қабылдамай, дереу медициналық көмекке жүгіну керек.

Тазалық пен сақтық – денсаулық кепілі!