ТАҒАМНАН УЛАНУДЫҢ АЛДЫН АЛУ ЖОЛДАРЫ

Тағамнан улану – халық денсаулығына тікелей әсер ететін өзекті мәселелердің бірі. Көбіне улану дұрыс сақталмаған, жеткілікті термиялық өңдеуден өтпеген немесе сапасыз өнімдерді тұтыну салдарынан туындайды. Сондықтан күнделікті тұрмыста қарапайым санитариялық-гигиеналық талаптарды сақтау маңызды.

Біріншіден, тағам өнімдерін сатып алу кезінде олардың жарамдылық мерзіміне, қаптамасының бүтінділігіне және сақтау жағдайына назар аудару қажет. Ет, сүт, балық өнімдері міндетті түрде тоңазытқышта сақталуы тиіс.

Екіншіден, тағам дайындау барысында жеке гигиена талаптарын орындау – уланудың алдын алудың негізгі тетігі. Қолды мұқият жуу, шикі және дайын тағамдарды бөлек ұстау, ас үй құралдарын дер кезінде тазалау – аса маңызды шаралар.

Үшіншіден, тағамның толық термиялық өңдеуден өтуіне мән берген жөн. Әсіресе құс еті, балық және жұмыртқа өнімдері толық пісірілген болуы керек. Бөлме температурасында ұзақ тұрған тағамды тұтынуға болмайды.

Сонымен қатар дайын тағамды +2…+6°С температурасында сақтау, бірнеше рет қайта қыздырмау сияқты ережелерді ұстану уланудың алдын алуға ықпал етеді.

Егер құсу, іш өту, дене қызуының көтерілуі секілді улану белгілері байқалса, өздігінен емделмей, дереу медициналық көмекке жүгіну қажет.

Қорытындылай келе, тағам қауіпсіздігін сақтау – әр азаматтың денсаулығын қорғаудың қарапайым әрі тиімді жолы. Санитариялық нормаларды күнделікті орындау тағамнан уланудың алдын алудың ең сенімді тәсілі болып саналады.