Мерекелерді тағамнан уланусыз қалай өткізуге болады?

Ұлыстың ұлы күні – Наурыз мерекесі қарсаңында әрбір отбасында мол дастархан жайылып, ұлттық тағамдар әзірленіп, қонақ күту дәстүрі кеңінен орын алады. Алайда мерекелік кезеңде тағамнан улану жағдайларының жиілейтіні тәжірибеде жиі кездеседі. Бұл, ең алдымен, тағамды дұрыс сақтамау, санитарлық-гигиеналық талаптардың сақталмауы және сапасыз өнімдерді пайдалану салдарынан орын алады.

Осыған байланысты мереке күндері тағам қауіпсіздігін қамтамасыз ету – өзекті мәселелердің бірі болып табылады. Тағамнан уланудың алдын алуда ең маңызды талаптардың бірі – дайын тағамдарды дұрыс сақтау. Мамандардың айтуынша, дайын өнімдерді бөлме температурасында 2 сағаттан артық қалдыруға болмайды. Әсіресе ет тағамдары, сүт өнімдері және майонез қосылған салаттар тез бұзылатындықтан, оларды міндетті түрде тоңазытқышта +2…+6°C температурада сақтау қажет.

Сонымен қатар, жеке гигиенаны сақтау тағам қауіпсіздігінің негізгі құрамдас бөлігі болып табылады. Ас дайындау алдында қолды сабынмен мұқият жуу, шикі және дайын тағамдарға арналған ас құралдарын бөлек қолдану, ас үйдегі тазалықты сақтау – инфекцияның таралуының алдын алудың тиімді жолдары.

Тағамды толық термиялық өңдеу де аса маңызды. Ет пен балық өнімдері толық пісірілуі тиіс. Шала піскен немесе жеткіліксіз қыздырылған тағамдарда зиянды микроағзалар сақталып, адам денсаулығына қауіп төндіруі мүмкін. Сонымен қатар дайын тағамды қайта тұтынар алдында оны толық қыздыру қажет.

Мерекелік күндері дайын тағамдарды сырттан сатып алу жағдайлары да жиі кездеседі. Бұл ретте өнімнің сапасына ерекше назар аудару қажет. Белгісіз немесе санитарлық талаптарға сай емес орындардан дайындалған өнімдерді тұтыну тағамнан улану қаупін арттырады. Сондықтан өнімнің жарамдылық мерзімі мен сақтау шарттарын міндетті түрде тексеру қажет.

Балалар мен қарт адамдар тағамнан улануға аса сезімтал топқа жатады. Осыған байланысты оларға тек жаңа дайындалған, сапалы және қауіпсіз тағамдарды ұсыну ұсынылады.

Қорыта айтқанда, мерекелік күндері тағам қауіпсіздігін сақтау – әрбір азаматтың жауапкершілігі. Тазалықты сақтау, тағамды дұрыс дайындау және сақтау, сапалы өнімді таңдау – тағамнан уланудың алдын алудың негізгі шаралары болып табылады.