ҚОҚЫСТЫ БАҚЫЛАУСЫЗ ЖАҒУ АПАТ ӘКЕЛЕДІ
Қазіргі таңда күнделікті тазарту жұмыстары қоқыс пен құрғақ шөпті жағу кент пен елді мекендерде жеке секторларда көптеп жүргізілуде. Алайда тұрмыстық қоқыстардан, құрғақ бұтақтардан, жапырақ пен шөптерден құтылудың бұл әдісі қоршаған ортаға айтарлықтай зиян келтіреді және қауіп төндіреді. Осындай жағдайлар әдетте қоқысты жинау және жағу кезіндегі талаптарды бұзу салдарынан туындайды.
Қазақстан Республикасының өрт қауіпсіздігі ережелерінің талаптарына сәйкес қоқысты жағу, тек ашық аумақтарда, желсіз күндерде әртүрлі ғимараттар, құрылымдар және сақталған материалдардан 50 метр қашықтықта сондай-ақ алғашқы өрт сөндіру құралдарды (өрт сөндіргіш, су) бар болған жағдайда ғана рұқсат етіледі. Қоқыс жағылатын алаң құрғақ шөп пен жапырақтардан тазалануы керек. Қоқыс жағылғаннан кейін отқа су құйылып мұқият өшірілуі тиіс. Өшірілмеген отты қараусыз қалдыруға тыйым салынады. Қалдықтар мен қоқыстарды осы мақсат үшін арнайы қашықтатылған жерлерде өртеу, қызмет көрсетуші қызметкерлер құрамының бақылауымен жүргізілуі керек.
Аудандық төтенше жағдайлар бөлімі ашық алаңдардағы қоқысты бақылаусыз жағу үлкен апатқа әкеп соғатынын ескертеді. Ауланы тазарту үшін қоқысты өртеп, оны бақылаусыз қалдыру салдарынан сіз айналаңыздағы қаншама затқа орасан зиян әкелетініңізді түсінгеніңіз абзал. Өрт салдарынан адам өміріне де қауіп әкелетініңізді ескеріңіз. Ауладағы көктемдік жұмыстарды атқарғанда және табиғат аясында демалғанда ашық отты пайдалану кезінде аса сақ болыңыздар.
Егер жоғарыда көрсетілген талаптар орындалмаған жағдайда, ҚР «Әкімшілік құқықбұзушылықтар туралы» Кодексіне сәйкес жеке тұлғалар мен лауазымды тұлғаларға орта және ірі кәсіпкерлік субъектілеріне қатысты айыппұл түрінде әкімшілік жауапкершілікке тартылады. Сол себепті тазалық жұмыстарын жүргізу барысында өрт қауіпсіздігінің талаптарын сақтап қауіпсіздік ережелерін ұмытпаңыздар. Төтенше жағдай орын алғанда 101 немесе 112 телефонына хабарласыңыздар.
Аудандық төтенше жағдайлар бөлімі
