Қазақстан Республикасының өрт қауіпсіздігі Ережелерінің талаптарына сәйкес қоқысты жағу, тек ашық аумақта, желсіз күндерде әртүрлі ғимараттар, құрылымдар және сақталған материалдардан 50 метр қашықтықта және алғашқы өрт сөндіру құралдары (өрт сөндіргіш, су) бар болған жағдайда ғана рұқсат етіледі. Қоқыс жағылатын алаң құрғақ шөп пен жапырақтардан тазалануы керек. Сондай-ақ өртеу жұмысы күндізгі уақытта тұрақты бақылау болған жағдайда ғана жағылуы қажет. Қоқыс жағылғаннан кейін отқа су құйылып, мұқият өшірілуі тиіс. Толық өшірілмеген отты қараусыз қалдыруға тыйым салынады. Қалдық пен қоқыстарды осы мақсат үшін арнайы қашықтатылған жерде өртеу қызмет көрсетуші құрамының бақылауымен жүргізілуі керек.

Қармақшы ауданының Төтенше жағдайлар бөлімі ескертеді:

Ашық алаңдардағы қоқысты бақылаусыз жағу үлкен апатқа әкеп соғады. Ауланы тазарту үшін, қоқысты өртеп, оны бақылаусыз қалдыру салдарынан сіз айналаңыздағы қаншама затқа орасан зиян әкелетініңізді түсінгеніңіз абзал. Өрт салдарынан адам өміріне де қауіп төнетінін ескеріңіз. Аулада көктемгі тазарту жұмыстарын жүргізгенде және табиғат аясында демалғанда ашық отты пайдалану кезінде аса сақ болыңыз.

Егер, жоғарыда көрсетілген талаптар орындалмаған жағдайда, ҚР «Әкімшілік құқық бұзушылықтар туралы» кодексінің 336-бабына сәйкес жеке тұлғалар мен лауазымды тұлғаларға орта және ірі кәсіпкерлік субъектілеріне қатысты айыппұл түрінде әкімшілік жауапкершілікке тартылады.

Сол себепті тазалық жұмыстарын жүргізу барысында өрт талаптарын сақтап, қауіпсіздік ережелерін ұмытпаңыз.

Төтенше жағдай орын алғанда 101 немесе 112 телефонына хабарласыңыздар.