– Жуырда ауылымызға еңбегі сіңген азамат Жарылқасын Байсаловтың 80 жылдық мерейтойы аталып өтті. Оған жер-жерден сыйлы қонақтар, өнер адамдары, іргелес жатқан көршілеріміз келіп қуанышымызға ортақтасты. «Келісіп пішкен тон келте болмайды» дейміз бе, дайындық екі ай бойы жүрді. Елдің ықыласы керемет болды. Ұйымдастырушылар апта сайын бас қосып, ақылдасып, кеңесіп отырды. Тойға адам көп жиналды. Екі күн бойы дүбірлеп өткен той елдің есінде ұзаққа сақталатыны белгілі. Палаткалар құрылды. Қонақасыға 2 жылқы, 1 сиыр сойылып, мол дастарқан жайылды. Келген кісілер де, өзіміз де дән риза болдық. Айтыс, ат жарысы, көкпар, балуандар белдесі секілді ұлттық спорттың бірнеше түрінен жарыс ұйымдастырылды. Мұны айтып отырған себебім, осының барлығы да ауызбірліктің, жанашырлықтың белгісі. Игі істе ақсақалдардың да еңбегі болғанын айта кету керек. Жүрген ортамызда үлкендік көрсетіп, насихат айтамыз. Елмен тығыз байланыстамыз. Битілеу Оразбаев, Бірлік Қойбағаров, Байзақ Төралиев және басқа да ардагерлер көптің арасында ағалық ақылын айтып, тәрбиелілікке шақырып отырамыз. Оның үстіне ауылдық учаскелік инспектор жұмысын жақсы білетін маман. Тынбай жұмыс істейді. Қызметі осында болғасын отбасын көшіріп әкелді, – дейді А.Жалғасбайұлы ауылдың бірлігін сөз ете.

– Жыл басынан бері ауылымызда қылмыс тіркелмеді. Шүкір дейміз. Бөлім басшылығының бұйрығымен мал ұрлығына байланысты ісшаралар өтеді. Рейдтік шаралар бар. Түн мезгілінде ел тыныш болсын деп, өзіміз де демалмаймыз. Түнде келген-кеткен көліктерді тексеріп, бақылап, оның үстіне квартал сайын есеп беру жиынында халыққа әрдайым айтып отырамыз. Пада ұйымдастыру, әркім өз малына ие болып, өрістен келмеген жағдайда бірден бізге хабарлауды ұдайы тапсырудамыз. Өйткені ол қылмысты дер кезінде ашуға септігін тигізеді. Қылмысты болдырмауда ауыл тұрғындарымен тығыз байланысып, жастар, үлкендеріміз бар ауызбірлікте жұмыс істеудеміз. Сыртта отыратын малшылармен де аптасына кемінде бір мәрте барып, пікірлесіп, мал-жан амандығын біліп отырамыз. Бөтен көлік көріп жатқан жағдайда хабар беруі керек екенін де олар жақсы біледі. Осындай әрекеттермен жұмыс жасайтынымызды ұрылар да біледі. Әуелі құдай, тыныштық болсын. Мақсатымыз сол – қоғамдық қауіпсіздікті сақтау, қылмысты болдырмау, алдын алу. Ауыл болғасын мал ұстамайтын түтін кемде-кем. Халық, ел болып әрбір өріске пада ұйымдастырсақ, деген жоспар бар. Егер де қылмыс бола қалған жағдайда, ізін суытпай ашу да басты мақсатымызға кіреді. Тек мал ұрлығы емес, ауылдың тәртібіне, хал-ахуалына, жалпы барлығына жауап береміз. Заңдық тұрғыда айтқанда, теріс қылық болса да жауаптымыз. Алдағы уақытта да алдын алу іс-шараларын күшейте береміз. Ауыл әкімшілігі, ақсақалдар, белсенді азаматтар бар, бәріміз бірге тығыз байланыста жұмыс жүргізе береміз, – дейді полиция майоры.