Азық-түлік бағасы тұрақты ма?
Қазір қоғамда талқыланып жатқан мәселе көп. Соның бірі – азық-түлік бағасын тұрақтандыру. Адамзат баласының қалыпты өмір сүруіне күнделікті тұтынатын қарапайым тұрмыстық тауарлар ауадай қажет болса, оның ішінде азық-түліктің рөлі басым. Иә, азық-түліктің пұлы қол жетімсіз болған жағдайда, тұрмыстың құты қашары анық. Бүгінде әлеуметтік маңызы бар тауар бағасының негізсіз шарықтауы – үйреншікті қалыпты жағдай. Доллар бағамы секілді бірде түсіп, бірде көтеріліп базардағы баға мың құбылып тұр. Оған не себеп? Бағаны тұрақтандыру үшін не істеу керек?
Қарпайым жағдай, базардан азық-түлік аларда сатушыға «неге қымбат?» деп сауал қойсаңыз «тасымал қымбат, жанармай ұшып тұр немесе делдалдар бағаны көтеріп жіберді» деген секілді уәжін қағады. Онымен қоса тауарға сұраныстың артуына байланысты баға көтерілді деген дайын жауап бере қояды. Ал халықтың жағдайын кім ойлап жатыр? Қазір ірі сауда орындарына баратындай елдің бәрі қалталы емес. Қалтаны қағып тастамаса да сәл үнем болсын деп жұрт базарды жағалайды. Бір мысал ел карантинге жабылар уақытта халық базар аралап босып кетті. Арзан азық-түлік іздеп сауда орындарын жағалады. Осындай да алыпсатарлардың қолы жүріп дүкендерде тауар бағасы қымбаттағаны рас. Қайта төтенше жағдай режимі кезінде мемлекетіміз азық-түлік бағасының қымбаттауына және алыпсатарлыққа жол бермей ауыздықтады. Әлеуметтік маңызға ие тауарлардың шекті бөлшек бағалары бекітілді. Әкімдіктер тарапынан азық-түлік бағалары бақылауға алынып, тұрақтандыру бойынша түрлі іс-шаралар өткізілді.Ал аудандағы азық-түлік бағасы тұрақты ма? деген сауалға көшсек бұл тұрғыда біраз шаруалар қолға алынды. Карантин уақытында дүкен сөрелеріне тұтынушыға жеткілікті деңгейде азық-түлік жеткізіліп тұрды. Баға тұрақтылығын ұстау мақсатында аптаның сенбі күндерінде жәрмеңке ұйымдастырылып халыққа арзан бағада азық-түлік өнімі ұсынылды. Ұйымдастырушысы «Байқоңыр» әлеуметтік кәсіпкерлік корпорациясы жәрмеңкеге 19 тонна өнімін әкелсе, картоптың келісін – 75, сәбіз – 75, жуа – 55, ал 20 келілік макаронды – 2800 теңгеден сатты.
Сонымен қатар «NurOtan» партиясымен бірге жұмысшы топ құрылып, кенттегі 9 сауда орынындағы күнделікті тұтынатын әлеуметтік маңызы бар азық-түлік өнімдерінің бағасын бақылау мақсатында мониторинг жүгізіліп отырылды.
Азық-түлік бағасын тұрақтандыруда жақында Жосалы кенті орталығынан Әлеуметтік дүкен ашылып, тұрғындарды қуантты. Себебі, отандық өнім тұтынушыға базар нарығынан әлдеқайда 10-15 процентке төмен ұсынылды.
Ерсін СӘДУҰЛЫ
