ЖЫР-ӘННІҢ ЕЛІ, ТҰРАННЫҢ ТӨРІ – ҚЫЗЫЛОРДА

Ауданымыздың «Руханият орталығында» Қызылорда қаласының астана болғанына 100 жыл толуына орай аудандық орталық кітапханасының ұйымдастыруымен «Жыр-әннің елі, Тұранның төрі – Қызылорда» тақырыбында жас ақындардың жыр мүшәйрасы өтті. Оның өткізілудегі мақсаты – заманауи поэзияның көкжиегін кеңейту, туған жер тарихын жырлау, жас ақындардың шығармашылығын шыңдау.

Мүшәйраның шартына сай талапкерлер «Әдепті елдің баласы алыстан сәлем береді» тақырыбында өзін-өзі таныстыру, тақырыпқа орай арнау және «Жаныма жақын жырларым» атты еркін тақырыпта өлеңдерін ұсынды.

Сөз сайысына 11-15 жас аралығындағы 8 жасөспірім қатысып, бақ сынасты.

Қазылар алқасы үміткерлердің ақындық өнеріне, сөз саптауына, өлең ұйқасына, ой жүйелілігі мен тереңдігіне, көркемдігіне, тіл тазалығы мен сахна мәдениетіне назар аударды.

Мүшәйраның қорытындысында І орынды Алдашбай ахун ауылындағы №111 мектептің 7-сынып оқушысы Мәди Елдес жеңіп алса, ІІ орынды Тұрмағамбет ауылындағы №29 мектептің 5-сынып оқушысы Мағжан Амангелдиев, ІІІ орынды Жосалы кентіндегі А.Жанпейісов атындағы №105 мектептің 5-сынып оқушысы Бибіажар Асқарқызы иеленді.

Жүлдегерлер мен басқа да қатысушылар аудандық орталықтандырылған кітапханалар жүйесі директорының диплом, алғыс хат, сыйлықтарымен марапатталды.