ЖАС АҚЫНДАР ТІЛ ҚАҚЫНДА ЖЫРЛАДЫ
Жақында Ш.Төлепова атындағы мәдениет үйінде Қазақстан халықтарының тілдері күніне орай «Туған тілім – тірлігімнің айғағы» атты аудандық жазба ақындар мүшәйрасы өтті.
Ана тілінің мәртебесін көтеру, дарынды жастардың шығармашылығын шыңдау мақсатында ұйымдастырылған шараға аудандық мәдениет және тілдерді дамыту бөлімі мұрындық болды. Оған 16-22 жас аралығындағы 13 талапкер қатысып, бақ сынады. Жазба ақындар сайысында әр үміткер екі өлең оқып, қазылар алқасының бағасына ие болды.
Мүшәйра қорытындысында «Туған тілім – тірлігімнің айғағы» және «Туған өлке» тақырыбындағы өлеңімен жосалылық жас ақын Еркебұлан Серіков бас бәйгені жеңіп алса, «Тілім – тірлігім» және «Абай ақынға арнау» атты өлеңімен төретамдық Аяжан Шалбай І орынды иемденді. Ал, Қармақшы ауылынан қатысқан жас талант Орынбек Құндыбеков «Тіл – қоғам айнасы», «Мәңгілік ел мұраты», қуаңдариялық Жансая Мұханбетияр «Тілім – шуағым», «Көп болды» атты өлеңдерімен ІІ және ІІІ орынды меншіктеді.
Ана тілді ардақтаған шарада жүлде салған жас талапкерлер аудандық мәдениет және тілдерді дамыту бөлімінің дипломы, сондай-ақ бағалы сыйлығымен марапатталды.
Сәрсенкүл ЖАУДАТБЕК,
«Қармақшы таңы».
