Гүлфариза жүлделі оралды

Таяуда Жаңақорған ауданында облыстық халық шығармашылығын дамыту және мәдени-продюсерлік орталығы мен Жаңақорған аудандық мәдениет және тілдерді дамыту бөлімінің ұйымдастыруымен Астана қаласының 20 жылдығына арналған «Нұрлы Астана» атты көркемсөз үйірмелері мүшелерінің облыстық байқауы өтті. Сайыста жерлесіміз Гүлфариза Кеңшілікова жүлделі ІІ орынды еншіледі.
Байқауға әр ауданнан және қалалық мәдениет үйлері жанынан құрылған «Көркемсөз оқу» үйірмелерінің 14 мүшесі қатысып, бақ сынасты. Конкурсқа қатысушы талапкерлер 2 шарт бойынша өнерін ортаға салды. Бірінші кезеңде сайыскерлер Астана қаласы туралы танымал ақындардың өлеңін оқыса, екінші кезеңде еркін тақырыпта көркемсөз оқып, шараның шырайын келтірді.
Байқау қорытындысында бас жүлде жаңақорғандық Д.Ыдырысовқа бұйырды. І орынға сырдариялық Н.Ғабдуллаева қол жеткізсе, ІІ орынды жерлесіміз Гүлжазира Кеңшілікова иеленді. Ал ІІІ орынның жүлдесін қызылордалық А.Асылбек пен жаңақорғандық А.Әшім өзара бөлісті.