Жыл көлеміндегі жүз бір жүздесу

Жосын келген жаман індет дүниені дүрліктіріп, біраз шығын әкелді. Қалыпты өмір ырғағы бұзылды. Мұндай дүрмектен ешкім де шет қалмады. Кәрі әбжыландай арбасқан індетпен күресте ақхалаттылар, полиция қызметкерлері мен әскерилер, сондай-ақ еріктілер тобы да аянып қалмады. Қолынан келген көмегін беріп, жағадан алған көрінбес жауды кері қайтаруға бар күш-жігерін салды. Оған "бір жеңнен қол, бір жағадан бас шығарып" халық та деместі. Ардагерлер мен жастар да жанашырлық танытты. Осындай күйіп тұрған күрделі кезеңде аянып қалмаған тағы бір қоғам өкілдері бар. Олар – журналистер. Іргеден лаң салған індеттің алдын алып, бетін қайтаруда тілшілер қауымы да қауіпті аймақтардан ақпарат таратып, насихаттық жұмыстарын жүргізуге атсалысты. Өз ұлтының патриоты екенін көрсете білді. Оны дақпырт етпей, күнделікті жұмысындай қалыпты тқара берді. Олардың қатарында ауданның бас басылымы саналатын "Қармақшы таңы" газетінің де тілшілері бар. Ауданның бірнеше жерінен қойылған блок-бекеттерде ішкі істер, медицина қызметкерлері және еріктілермен бірге журналистер де рейдтерге шығып, репортаж, фоторепортаждар жасады. Жауапты мамандармен сұқбат құрып, дәрігерлік кеңестерін газет бетіне жазды. Қалам ұстаған шағармашыл орта сақтық шарасын сақтай отырып, елді мекендегі ағайынға да жол тартты. Онда ауыл халқының тыныс-тіршілігін өз көзімен көріп, мәйекті мақалалар жариялады.

Елбасы Нұрсұлтан Назарбаев пен Қазақстан Президенті Қасым-Жомарт Тоқаевтың бағдарламалық мақалалары мен Жолдауларында берілген тапсырмалардың тыңғылықты орындалуы, "Рухани жаңғыру" тақырыбы аясында, "Еріктілер" жылы, сондай-ақ Әбу Насыр әл-Фараби, Алтын Орда және һакім Абайдың мерейтойларына орай тұрақты айдарлармен материалдар берілді. Осы жылы көктемде шыға бастағанына 89 жыл толатын аудандық басылым тілшілерінің негізі жастардан тұратынына қарамастан жыл шеңберінде ізденіспен жұмыс істеп, шығармашылық қуатын шыңдап отырды. Еркін тақырыпта көсіле жазып, оқырманына мәнді де мағыналы еңбектер ұсына білді. "Айна", "Қоғам", "Діңгек", "Руханият", "Басты байлық", "Спорт", "Жансарай", тағы басқа да газет бетінде арнайы беттер ұйымдастырылып, әрбір сала бойынша топтамалық материалдар жарыққа шықты. Еңбек пен бірлік – қашан да ұлттың ұстыны. Бұл бағыттағы "Еңбек адамы", "Тағылым", "Зерде", "Өзек", "Мәселенің мәнісі", "Тіршілік таразы", "Тыныс", "Кәсіп", "Антына адал болғандар", "Даму", "Біздің көшенің тұрғындары", сонымен бірге шығармашылық бағытында "Өмірдің өзінен", "Көңіл күнделігі", "Қаз-қалпында", тағы басқа да айдарлар тұрақты түрде берілсе, жыл басынан бері "Бұл үйде кім тұрған?", "Біртүйер", "Тәуелсіздік құрдастары" сияқты жаңа айдарлармен толығуда.

Көзді ашып-жұмғанша бұл жылдың да алғашқы айын еңсеруге таяумыз. Міне, бүгін газетіміздің №6 саны оқырман қолына тимекші. Жыл көлемінде аудандық "Қармақшы таңы" газетінің 101 саны жарық көріп, қалың оқырманын нақты ақпаратпен қамтамасыз етіпті. Газетте басылымның электронды нұсқасы мен сайт жұмысы да қоса жүргізіліп келеді. Бүгінде бас басылым сайт және әлеуметтік желілер арқылы жылдам хабар таратып, медиа кеңістіктен ойып өз орнын алуда.

Оқымандарымызбен 2020 жылы жүз бір мәрте жүздесіппіз. Әрине оған өте қуаныштымыз да. Бұл бізге үлкен мәртебе. Осы ретте "Қармақшы таңының" әрбір санын асыға күтетін ойы қарақты оқырмандарымызға риясыз көңілден алғыс айта отырып, қиын да қызықты журналистік қызметімізді әрі қарайда адал атқара беретінімізге зор сенім білдіреміз.