Бұл індет әлем жұртына оңай тимеді. Вирус тек қана адам шығынын алып келген жоқ. Оның әсерінен экономика құлдырап, көптеген жан жұмыссыз қалды. Елімізде карантин уақыты тағы екі аптаға созылды. Себебі елдегі ахуал әлі тұрақталған жоқ. Осы ретте мемлекет қазақстандықтарға үшінші мәрте 42500 теңге көлеміндегі жәрдемақы төлемек.

Бұл – мемлекет тарапынан жасалған оң шешім. Себебі індеттің залалы халыққа ауыр тигені рас. Жұмысы тоқтап, отбасылық кіріссіз қалғандар қатары көп. Енді олар бұл көмекті оңтайлы пайдаланып, қажетіне жаратпақ. Бастысы – көмекке тек шын мұқтаж жандар қол жеткізеді. Өйткені енді жұмыссыз қалғандар жайлы ақпаратты жұмыс беруші беретін болады.

Десе де маңдай термен, еңбектеніп тапқанға ештеңе жетпейді. Ал ол күнге жету үшін карантин талаптарын қатаң сақтап, індеттің алдын алу қажет. Қазіргідей күрделі кезеңде мемелекет ешкімді қиындықта қалдырмаудың қамын істеуде. Азық-түлік тапшылығын болдырмау мақсатында тауарлар бағасын бақылауда ұстап отыр. Осындай жағдайларды ескере отырып, біз де қолдау көрсетуіміз керек. Карантин уақытында үйде отырғандарды сабырға шақырып, көбі кетіп, азы қалғанын айтқым келеді.

Президент Қасым-Жомарт Тоқаев та жауапты сала басшыларына нықтап тапсырма берді. Оның ішінде еліміздің медицина, білім және ғылым саласын дамыту бар. Бұл шешім мемлекеттің әлеуетін арттырып, халық үшін бірнеше мүмкіндік әкелетіні сөзсіз.