Қиын күндер артта қалсын

«Үй алма, көрші ал» деген қазақ халқы қоныстанбас бұрын тұрғынына қарайтын. Құдай қосқан көршің жақсы болса көңілің жайлы. Тұрғындары әрқашан біріге іс қылатын, ауызбіршілігі мол көшелер ауданымызда аз емес. Солардың бірі – бір елге рухани басшы болып, әулиелік, емшілік қасиетімен халықтың ауызбірлігін, ел арасының тазалығын, адамдардың имандылық жолындағы ақ ниетін сақтауға өлшеусіз күрес жүргізіп, дін жолын белсене насихаттаған Мәдірайым Құлмағамбетұлының атына берілген «Мәдірайым ишан» көшесінің тұрғындары.

Қуанышы мен қайғысын бөлісіп, көмек қажет кезде қол ұшын созатын ұйымшыл көше тұрғындарының үлгілі істері көп-ақ. Үлкенді құрмет тұтқан олар жұдырықтай жұмыла әрекет етуді әдетке айналдырған. Мұны көріп өскен жас буын да бұл дәстүрді берік ұстанары хақ. Бүгінгі елдің ахуалына орай үнсіз қалуды құп көрмеген олар, бұл індеттің тезірек жойылуын тілеп тасаттық беруді жөн көріпті.

– Қазіргі бүкіл жер бетінде болып жатқан жағдайдың қай-қайсымызды болмасын алаңдатып отырғаны рас. Індеттің кесірінен қанша отбасы қимасынан айырылды. Бұл кімге де болса оңай емес. Сол себепті көше тұрғындары болып құрбандық шалып, бұл күндердің тезірек артта қалуын ниет еттік, – дейді тұрғындар.

Қазіргі талапқа сай жиын өткізілмеді. Тек имаммен ниет етіліп, Құран оқылып, құрбандық шалынды. Етті 7 бөлікке бөліп, әлеуеті әлжуаз жеті отбасына бір апталық азық-түлікпен қоса таратылды. Қол жайып, дұға тілеген көптің тілеуі қабыл болып, жаймашуақ күндердің келетінін сабырмен күтейік.

Ардақ СӘКЕНҚЫЗЫ

Жаңалықтар / Руханият

18 шілде 2020 ж. 1 228 0