ЕРЛІКТІ ЕСЕЛЕГЕН ҚҰЖАТ
«Ер есімі – ел есінде» дегендей, туған халқының болашағы үшін бар саналы өмірін арнап, төрінен көрінгендер ауданда жетерлік. Кеңес Одағы жылдарында Ұлы Отан соғысы және одан кейінгі бейбіт жылдарда қазақ даласында еңбек еткен малшыдан бастап ұстаз бен дәрігер, жұмысшы мен билікте лауазымды қызмет еткендер де Үкіметтің түрлі орден-медаліне ие болды.
Бірақ кейбір жағдайларда осындай марапаттар иесін өздері өмірден өткен соң тауып жатады.
Сондай атпал азаматтың бірі – саналы өмірін ұрпақ тәрбиесіне арнап, ел құрметіне бөленген «1941-1945 жылдарғы Ұлы Отан соғысында көрсеткен ерен еңбегі үшін» медалінің иегері атанған, 1961 жылы 49 жасында өмірден озған Жолмахан Кенжалиев.
Жуырда оның қызы Күлән Жолмаханқызы редакцияға хабарласып, әкесінің облыстық архивтен 1947 жылы «За трудовую доблесть» медалімен марапаттау қағазы табылғанын айтты.
Расында да, біз Күлән апай әкелген осы уақытқа дейін облыстық архивте сақталған құнды құжатты парақтап отырып, Чапаев атындағы жетіжылдық мектепте директордың орынбасары қызметін атқарған Жолмахан ағамыздың марапаттау құжатында ҚазКСР Ағарту министрі мен кадр бөлімі бастығының қолы қойылғанын көрдік. Аталмыш награданың жақын арада шынайы иесінің омырауына тағылмаса да оның ұрпағына табысталатынына біз де қуандық.
Нұрбай ЖАНӘДІЛОВ
