БАСҚЫНБАЙ ҚАЙЫРБЕКҰЛЫ КӨШЕСІ

Басқынбай Қайырбекұлы 1909 жылы Жосалы кентінде  жұмысшы отбасында дүниеге келген.  Ол 1925 жылы аудан орталығындағы қазіргі Шоқан Уәлиханов атындағы №26 орта мектепте білім алып шыққан соң, алғашқы еңбек жолын аудан орталығындағы жылжымалы механикалық колоннада құрылысшы болып бастаған.

Белсенді жас сол жылдары өңір жастарын білім алуға, еңбек етуге, қоғамның өсіп-өркендеуіне атсалысуға жұмылдырып, жиырмасыншы жылдардың аяғы мен қырқыншы жылдары ауданда голощекиндік саясатпен қазақ халқына қарсы жүргізілген ашаршылық, қуғын-сүргін сияқты зұлматты істерге қарсы шығып, елді бірлікке шақыруда аянбай еңбек еткен. Ұлы Отан соғысы жылдарында туған жерді неміс басқыншыларынан азат етуге қатысып, майданнан аман-есен оралғаннан кейін  елде халық шаруашылығын қайта қалпына келтіру жұмыстарына белсене араласқан.

Коммунист, ел қамқоршысы атанған атпал азамат соғыстан кейінгі жылдарда  партия тапсырмасымен механикалық зауытта,  жол жөндеу мекемесінде басшылық қызметтер атқарды.  Сонымен қатар, ауданда ұсақ ауылдарды  ірілендіру  жұмыстарына белсене араласты. Оның ішінде, «Ақжар» МТС-ін ұйымдастыру жұмыстарының басы-қасында болды. Сондай-ақ, ол аудандық партия комитетінің партиялық комиссиясының мүшесі болған жылдарда аудан тұрғындарының, нақтырақ айтқанда тұрмысы төмен  және көпбалалы отбасылар мен  жалғызбасты қарттарды, мүгедектерді  рухани және материалдық жағынан қолдау мақсатында аянбай еңбек етті.  Бірақ, бала кезден бойын дендеген дерттің салдарынан ол 1971 жылы 62 жасында өмірден озды.

Туған елінің өсіп-өркендеуі жолында аянбай еңбек етіп, халқына адал қызмет еткен атпал азаматтың еселі еңбегі  өкімет тарапынан бағаланып, Ұлы Отан соғысы жылдарындағы ерлігі мен бейбіт кезеңдегі елеулі еңбегі үшін  ол бірнеше орден-медальмен, сонымен бірге құрмет грамотамен, басқа да мадақтамалармен марапатталды.

Бірнеше ұл-қыз тәрбиелеп өсіріп, олардың қоғамнан өз орынын табуына еңбек сіңірді.