Жиында аудан әкімінің орынбасары Еркебұлан Меңлібаев шара қонақтарына аудан әкімі Сұлтан Мақашовтың лебізін жеткізіп, та­қы­рып аясында өңірімізде атқарылып жатқан жұмыстарға шо­лу жасады. Сонымен қатар, эт­но­саралық тату­ластық пен ын­ты­мақтастықты мақ­сат етіп қой­ған тәуелсіз Қазақ­с­танның өс­іп-өркендеуі жолын­дағы же­тіс­тіктері мен достық, тату­лық­тың шынайы мекені атан­ған ұлан-ғайыр қазақ жерінде бір ананың баласындай тату-тәтті өмір сүріп жатқан түрлі этнос өкіл­інің тұрмыс-тіршілігі жайлы әңгімеледі. Оның ішінде, аудан тұрғындары арасында өзінің өнегелі өмірімен есте қалған атпал азамат Вахид Гу­бановтың ауданымыздың дамуына қосқан елеулі еңбегі мен үлесі жайлы баяндады.
Форумда «Вайнах» ассоциациясы төра­ғасының бірінші орынбаса­ры, «Даймохк» шешен-ингуш мә­де­ни орталығының басқарма бас­шы­сы, Қазақстан халқы Ассамблеясы мен «Нұр Отан» партиясы саяси Ке­ңесінің мүшесі Абу-Касым Хажалиев Қазақстан халқы Ассамблеясы бойынша атқарылып жатқан жұ­мыс­тарды сараласа, Қызылорда қала­сындағы Қорқыт ата мемлекеттік уни­верситетінің оқытушысы, педагогика ғылымдарының кан­дидаты, профессор, халықаралық педаго­ги­калық білім академиясының академигі, «Қазақстанның Құрметті спорт қайрат­­кері» төсбелгісінің иегері Жақсы­бек Егізбаев, Корей мәдени орталығының мүшесі Юрий Ким, «Сибирьское здоровье» корпорациясының аймақтық кеңесшісі Айнаш Алдашева мен татар-башқұрт мәдени орта­лы­ғының мүшесі Эльмира Сайдгарие­ва, Қызылорда облыстық білім басқар­ма­сының ай­мақтық дене тәр­биесі мето­дикалық ор­талығының директоры Бауыржан Әбенғалиев «Физиология және медицина: Дене тәрбиесінің өзекті мәселелері» тақы­ры­бында баяндама­лар оқып, онда айтыл­ған өзекті мә­селелер бойынша өз ойымен бө­ліс­ті.
Форум соңында мәртебелі мейман Абу-Касым Хажалиев Шешенстан мен Қазақстан елдері ара­сындағы ынтымақтастықты ны­ғай­туда өнегелі істерімен үлгі көрсетіп жүрген бір топ азаматқа Шешенстан Республикасы Ішкі істер, Білім, Спорт және денешынықтыру министрліктері және Грозный қа­ласындағы Нұр­сұлтан Назарбаев атындағы №1 лицей ұжымы дирекциясы және Қазақстан халқы Ассамблеясы жанынан құрылған «Вайнах» ассоциациясы, сондай-ақ, Ше­шенстандағы «Динамо» спорт бір­лес­тігінің мадақтамаларын та­быс етсе, өз кезегінде аудан әкі­мінің орынбасары Еркебұлан Мең­лібаев қонақтарға сый-құрмет көр­сетті.
Мұнан соң форум аудандық де­не­шы­нықтыру және сауықтыру ке­ше­нінде дзюдодан 2002-2003 жыл­дары ту­ған жасөспірім татами шеберлері ара­сында өткен об­лыстық командалық жарысқа ұласты.
Биыл жалауы екінші рет желбіреген жас дзюдошылар бәсекесінде Қызылорда мен Бай­қоңыр қалалары жә­­­не аймақтың барлық өңірінен жиналған жас дзюдошылар жарыс жүлдесін сарапқа салды.
Күн бойы созылған тартысты бәсекенің финалында «Қы­зылорда-2» командасы мен қармақшылық спорт мектептері құрамасы арасында өткен ақтық белдесуде қызылордалық балуандар жарыстың бас жүлдесін жеңіп алып, 100 мың теңгенің сертификатына ие болса, Дархан Алмаханов, Әділбек ­Кене­­ев жаттықтыратын, құ­рамында Тимурлан ­Қу­ан­­таев, Бекзат Қазиханов, Нұрдәулет ­Ерә­лиев, Алмат Қожабаев, Ерсін Тоқтаров,­ ­Рахат Шәймерденов жә­не Ержан ­Маратбек сынды келе­шегінен зор үміт күттіретін жас татами шеберлерінен құрылған «Спорт мектеп» командасы жүл­делі ІІ орынға көтерілді. Ал, қы­зыл­ордалық «Спорт интернат» құ­рамасы жүлделі ІІІ орын иегері атанды.
Сонымен бірге, жарыста үздік өнер көрсеткен Диас Алпысбай мен Тимурлан Қуантаев жарыс демеушісі Дастан Даң­лыбаевтың арнайы жүлдесіне ие болды.
Жарыстың жабылу салтанатында аудан әкімінің орынбасары Еркебұлан Меңлібаев, «Дәулет» қо­рының прези­денті Жомарт Кө­шербаев, Вахид Гу­­ба­­новтың ұлы Руслан Губановтар құттықтау сөз сөйлеп, жарыс жеңімпаздары мен жүлдегерлеріне сый-құрмет көр­сетті.