Асқар Жарылқасыновтың бұл істі кәсіп қылғанына жеті-сегіз жылдың шамасы болды. Алғашында іргедегі Дүр Оңғар ауылында талай жыл трактор айдаған ол кейін денсаулығы сыр берген соң егіс алқабындағы жұмыстан алыстаған. Жұмысты біржола қойып, қолда бар мүлікті арқалап аудан орталығынан бір-ақ шықты. Ақ халаттылардың алдына жиі баратын болған соң, тұрақты жұмыстың сәті түспеді.
– Қазірдің өзінде біраз жер мені танып алған. Екі күн ауру, бір күн сау адамды кім жұмысқа алғысы келеді. Денсаулығың болмаса, ешкімге керек емессің. Қазір қолдан келетін жалғыз іс – көлік жөндеу. Қай жері болса да, кірісіп кетіп, жөндеп беріп, ақысын адам шошырлық емес, бергенін алып қала беремін. Осылай жал­ғасып келе жатыр, – деді Асқар Жарылқасынов.
Аулаға жаңа баспана салуды ұйғарып іргетасын қалауға енді ғана бекінгенде денсаулығы тағы сыр береді. Қайран жүректің соғысы жиілеп кетсе де бала-шаға қамы деп, жұмысқа қызу кірісті. Қолынан іс келетін жігітті ел таниды, ауыл адамдары көлігі қисайса, осында әкеліп, жөндетіп алады. Рас, тіпті көліктер кеп­теліп, істеуге мүмкіндік болмай мұ­­ры­н­­­­­­­­­­­­­­­­­нан сүрлігіп жататын кез көп.
– Қазірдің өзінде аулада төрт машина тұр. Шетелдік көліктің түр-түрін жөндедік. Ұшақ пен тікұшақтан басқасының бар­лығы осы аулада тұрып кетті біраз. Кеше ғана тоғынан ақау шығып, жанып кеткен Уаздың өзін қайта оталдырып, ауладан шығарып жібердік. Негізі көбіне тоқ жағынан ақау болғандар келіп жатады. Мотор жағы болсын, басқа да қосалқы бөлшектері болсын ауыстырып, жөндей береміз, – дейді көлік жөндеудің шебері.
Қарамағына бір көмекші алып, істің қыр-сырына қанықтырып, баулуда. Үлкен шеберхана ашуға мұрша жоқ екенін айтады. Мемлекеттік бағдарламамен несие алудың жолын қарауда. Ылдилап жүрген осы қадамның өзі талайдың сауабына қалдырып отыр.
– Негізі көліктің өртеніп кетуі электр желісіндегі ақаудан болады. Сондықтан, тауықты да қасапшы сойсын дегенді ұмыт­пағанымыз абзал. Тоқ жағын жөн­деуден көзіміз ағарған біздің өзіміз жеті рет өлшеп, бір рет кесеміз. Өйткені, бір ғана қателік барлық жұмысты еш қылу мүмкін. Барлығын жөндеп, ақауын реттеп болсақ та, қайтадан бір қараймыз. Аса ұқыптылықты қажет етеді. Жүргізушілерден сұрайтынымыз, көліктің тоқ өткізу жағы ең жауапты екенін естен шығармаса, – деді Асекең бізбен әңгімесінде.
Жыбырлаған көліктің көбі ақаудан көз ашпай жатады. Сонда байқағанымыз, маманы жөндеген олқылық ретіне келеді, ал өзіміз қолдан келгенін жасап жатып, артық қыламын деп тыртық қып алатынымыз бар.