Күз диқаншылар үшін – жауапты науқан. Өйткені, ала жаздай төккен тердің қарымын қайтаратын шақ осы. Мамандардың айтуынша, үстіміздегі жылы күріш көрсеткіші өз деңгейінен шықпақ. Аудандық ауыл шаруашылығы бөлімінің мәліметіне қарағанда, қазіргі кезде аудан диқаншы қарқыны жаман емес. Өңірде егілген барлығы 23,9 мың гектар егіс алқабы жиналып болуға жақын. Оның ішінде, бақша өнімі мен көкөніс дақылының соңғы гектарлары жинақталуда. Ал, күріштіктегі 13850 гектар өнімнің қазіргі таңда 8200 гектары орылып, 6800 гектары бастырылды. Гектар түсімділігі – 52 центнерді құрауда.
– Егін жинау жұмысына 116 трактор, 80 комбайн, 84 жатка, 62 жүк көлігі, 94 трактор тіркемесі қамтылуда. Дала қостары мен астық қырмандары толығымен жасақталып, үздіксіз қызмет жасауда. Нәтиже де ойдағыдай болуда. Әсіресе, «Жаңажол», «Ақтөбе и К» жауапкершілігі шектеулі серіктестігі диқандары әр гектардан 60-65 центнерден өнім жинауда, – дейді аудандық ауыл шаруашылығы бөлімінің басшысы Сабытбек Жолмаханов.