Қадірлі жерлестер!

Сіздерді көктемнің шуағымен жеткен, жаңару мен жасампаздықтың бастауы – Ұлыстың Ұлы күні, Наурыз мейрамымен шын жүректен құттықтаймын!

Наурыз – табиғат пен адамзаттың үндестігін паш ететін, бірлік пен татулықтың жарқын үлгісін көрсететін мейрам. Бұл күн – халқымыздың сан ғасырлық дәстүрін дәріптейтін, ырыс пен ынтымақтың, мейірім мен берекенің символы.

Ежелден қазақ халқы бұл күні кешірім мен келісімді, ізгілік пен мейірімді ту етіп, ақ дастарқан жайып, жеті түрлі дәмнен әзірленген наурызкөжеден дәм татқан. Бүгінде осынау тамаша дәстүрлер қоғамды рухани жаңғыртуға, ұлттық құндылықтарымызды дәріптеуге ықпал етіп келеді.

Биыл Наурыз мейрамы ел көлемінде ерекше салтанатпен, кең ауқымда тойланды. Мемлекет басшысының бастамасымен әзірленген Наурыз мейрамын жаңаша атап өтудің тұжырымдамасына сәйкес, 14-23 наурыз аралығында елімізде «Наурызнама» онкүндігі ұйымдастырылды.

Бүгінде ауданымыз әлеуметтік-экономикалық тұрғыдан қарқынды дамып, халықтың әл-ауқаты арта түсуде. Жаңа әлеуметтік нысандар бой көтеріп, кәсіпкерлік пен өндіріс саласы өркендеп, инфрақұрылым жүйесі жақсарып келеді. Бұл – елдің бірлігі мен ынтымағының, еселі еңбектің жемісі.

Сонымен қатар, ел бірлігін бекемдей түсетін маңызды алаң – Ұлттық құрылтай биыл Арқаның көрікті өлкесі Бурабайда өтіп, мемлекеттік даму жолындағы өзекті мәселелер кеңінен талқыланды. Мемлекет басшысы Қасым-Жомарт Тоқаев осы жиында құрылтайдың келесі отырысын Сыр елінің бас шаһары – Қызылорда қаласында өткізу туралы ұсынысын жеткізді. Бұл – өңіріміздің рухани-мәдени маңызының айқын көрінісі.

Қадірлі ағайын!

Осынау Ұлыстың Ұлы күні әр шаңыраққа ырыс-несібе, қуаныш пен молшылық әкелсін! Қасиетті бабаларымыздың ақ батасы қабыл болып, халқымыздың ынтымағы арта берсін! Ұлыс оң болсын, ақ мол болсын! Наурыз мейрамы құтты болсын!