ҚАРМАҚШЫ АУДАНЫ ӘКІМІ ӘЛЕУМЕТТІК НЫСАНДАРДЫҢ ЖАЙ-КҮЙІМЕН ТАНЫСТЫ
Бүгін аудан әкімі Жандос Еркінбек жұмыс сапарымен Жосалы кентіндегі бірқатар әлеуметтік нысандарды аралап, олардың қызметімен танысты.
Алдымен аудан басшысы Балқы базар көшесінде орналасқан денешынықтыру-сауықтыру кешенінің жұмысын көріп, жас спортшылармен кездесті. Олардың дайындығы мен спорттық инфрақұрылымның жағдайын бағамдап, спортты дамыту бағытында ұсыныстарды талқылады.
Одан кейін жастар саябағы мен стритбол алаңының қазіргі жай-күйін көріп, олардың халыққа қолжетімділігін арттыру және күтіп-ұстау мәселелерін қарастырды.
Сапар барысында аудан әкімі «Шипагер» емханасының қызметімен танысып, көрсетілетін медициналық қызметтердің сапасын арттыруға қатысты пікір алмасты. Сондай-ақ, балалар кітапханасының жұмысын көріп, жас оқырмандарға жасалған жағдайды саралады.
№20 «Толғанай» бөбекжай-бақшасына арнайы барып, балабақшадағы тәрбиелеу және білім беру процесін бақылап, ондағы материалдық-техникалық базаны жақсарту мүмкіндіктерін талқылады.
Жұмыс сапары барысында аудан әкімі әлеуметтік нысандардың тиімді жұмыс істеуін қамтамасыз ету мақсатында тиісті сала басшыларына бірқатар тапсырмалар берді.
