Аудан әкімінің құттықтауы

Қадірлі жерлестер!

Сіздерді жаңа 2025 жыл мерекесімен шын жүректен құттықтаймын!

Жаңа жылды жұртшылық асыға күтеді. Бұл – жақсылыққа толы жайдары уақыт. Өткенді қорытындылап, келешекке жоспар құратын межелі кезең.

Өтіп бара жатқан жыл ауданымызды елеулі жетістіктерге, тың бастамаларға жетеледі. Маңызды оқиғаларға толы болды. Қолға алынған ауқымды жобалар табысты іске асып, тұрғындардың өмір сүру сапасын арттыруға айтарлықтай үлес қосты.

Аймақ басшысы Нұрлыбек Машбекұлының ерекше қолдауының арқасында ауданымыз дамудың даңғыл жолына түсті.

Аудан бюджеті 18 млрд 593 млн теңгені құрап, 2023 жылғы бекітілген бюджетпен салыстырғанда 6 млрд 601 млн теңгеге, яғни 55,0 пайызға артты.

Макроэкономикалық көрсеткіштер бойынша ауданымыз облыс аудандары арасында алыңғы қатардан көрінді. Инженерлік, коммуналдық инфрақұрылымын дамытуда ауқымды жұмыстар жасалды. Жол сапасын жақсартуда кешенді шаралар қабылданып, ауданымыз қарқынды құрылыс алаңына айналды.

Аудан ажарын айшықтайтын зәулім ғимараттар мен тұрғын үйлер бой көтерді. Денсаулық сақтау мекемелері, мәдениет және спорт нысандары салынып, халық игілігіне пайдалануға берілуде. Бұл нысандар жергілікті тұрғындардың өмір сүру сапасын жақсартып, әлеуметтік және мәдени дамуға серпін беруде.

Әр салада тұрақты өсу мен даму байқалады. Сонымен қатар спорт, мәдениет, білім беру, әлеуметтік салалармен қатар кәсіпкерлік пен ауылшаруашылығы салаларында да айтарлықтай жетістіктерге қол жеткізілуде.

Әрине, мұның барлығы аймақ басшысының қолдауымен аудан халқының береке бірлігі мен тату тірлігінің арқасында жүзеге асуда.

Келе жатқан 2025 жыл еліміз үшін құтты, берекелі және табысты болсын!

Ынтымағымыз нығайып, ырысымыз еселенсін! Баршаңызға зор денсаулық және амандық тілеймін!

Тәуелсіз Қазақстанымыз өсіп-өркендей берсін!

Жаңа жыл құтты болсын!