ОБЛЫС ӘКІМІНІҢ ОРЫНБАСАРЫ «РУХАНИЯТ» ОРТАЛЫҒЫНЫҢ ҚҰРЫЛЫСЫН БАҚЫЛАДЫ
Қармақшы ауданына Қазақстан Республикасы Президентінің «Байқоңыр» кешеніндегі арнаулы өкілі, облыс әкімінің орынбасары Қайрат Нұртай жұмыс сапарымен келіп, облыс әкімінің тапсырмасына сәйкес өңірде жүзеге асырылып жатқан маңызды жобалардың бірі – «Руханият» орталығының құрылыс жұмыстарымен танысты.
Сапар барысында Қайрат Нұртай аудан әкімі Жандос Еркінбекпен бірге нысанның құрылыс сапасын, жұмыстың уақытылы орындалуын және жобаның жергілікті тұрғындардың рухани-мәдени қажеттіліктеріне сай болуын мұқият тексерді.
Облыс әкімі бастамашы болған бұл орталық өңірдің рухани дамуын арттырып, ұлттық құндылықтарды дәріптейтін заманауи кешен болмақ. Жоба аяқталғаннан кейін ауданның мәдени инфрақұрылымы жаңа деңгейге көтеріліп, тұрғындар үшін мәдени іс-шараларды ұйымдастырудың басты орталығына айналады деп күтілуде.
