Халықтық штаб мүшелері ауыл тұрғындарымен АЭС-ті талқылады

АЭС салуды қолдау жөніндегі республикалық Халықтық штаб мүшесі ҚР Парламенті мәжілісінің депутаты М.Ергешбаев және аудандық штаб мүшелері Ә.Құлдүйсенов, К.Раева Қармақшы ауылы тұрғындарымен кездесті.

Кездесу барысында М.Ергешбаев АЭС салу жөніндегі республикалық референдум қарсаңында осы тарихи оқиғаның маңызы туралы ауыл халқымен ашық әңгімелесу үшін арнайы келгенін атап өтті.

Қазіргі таңда энергия тұтыну деңгейі жоғары қарқынмен ұлғайып келе жатқанын еске салып, электр энергия тапшылығы бүгінде еліміздің оңтүстігінде айрықша сезілетінін атап өтті. Былтырғы қорытынды бойынша дефицит 3,1 млрд кВт/сағ құрады. Салыстыру үшін айта кетсек, орташа есеппен 100 мың тұрғыны бар бір қала 700 млн кВт/сағ тұтынады. Егер бұл үрдіс жалғаса беретін болса, алдағы онжылдықтарда энергетикалық тапшылыққа тап болуымыз мүмкін екенін ескертті. Бұл мәселені шешудің бір жолы ретінде атом электр станциясын салу қажеттілігін ұсынды. Оның айтуынша, атом станциясы елімізге энергиямен тұрақты қамтамасыз етуге мүмкіндік береді және энергетикалық тәуелсіздікті нығайтуға ықпал етеді.

«Мемлекет тағдырына қатысты кез келген маңызды шешім халықтың қатысуымен және оның пікірін ескере отырып қабылданады. Президентіміз ұстанған саясаттың бұлжымас қағидасы – осы. Бұл – біздің қоғамда жаңа саяси мәдениет қалыптасқанының көрінісі. Біз әр қадамды нық басып, реформаларды кезең-кезеңімен жүзеге асырып келеміз. Түпкі мақсат – оны әр азамат, әр отбасы сезінуге тиіс», – деді ол.

Кездесу барысында аудандық Халықтық штаб мүшелері Ә.Құлдүйсенов пен К.Раева атом энергиясының қоршаған ортаға тигізер әсері мен экологиялық ахуалды жақсартуға бағытталған негіздерге тоқталды.