АЭС салуды қолдау жөніндегі аудандық Халықтық штаб «ҚазТрансГаз» Қармақшы аудандық филиалы мамандарымен кездесті. Кездесуде АЭС салу жобасы кеңінен талқыланды.

«Президент халыққа Жолдауында экономикамызға қажет мол қуат көлемін атом энергетикасы қамтамасыз ете алатынын сөз етті. Халықтық штаб мүшелері АЭС электр энергиясына деген сұраныстың азаюына тікелей әсер ететінін айта кетті. Сонымен қатар, атом электр станциясының құрылысы кезінде жаңа жұмыс орындары пайда болып, жоғары технологиялық салалардың дамуын қамтамасыз ететіні жайында айтылды.

Мамандардың айтуынша, электр қуатын тұтыну көлемі жыл сайын 3 пайызға артуда. Ал өзімізге мәлім электр қуатын өндіруде көмірдің рөлі басымырақ. Бүгінде электр қуатының 70 пайызы көмірден өндіріледі. Демек, ауаға тарайтын көмірқышқыл газының да үлесі артуда. Улы заттардың қосындысы қоршаған ортаға да кері әсерін тигізуде. Сондықтан, дамыған елдер жасыл энергия саналатын атом станциясының жұмысын жандандыруда. Атом энергетикасы қоршаған ортаға қолайлы, ел экономикасына тигізетін септігі мол сала.

Соның негізінде Мемлекет басшысы халыққа жолдауында жалпыхалықтық референдум арқылы маңызды таңдау жасау қажеттілігін атап өткен болатын», - деді Халықтық штаб мүшесі А.Тулебеков.

Кездесу соңында «ҚазТрансГаз» саласы қызметкерлері штаб мүшелеріне сұрақтарын қойып, референдумға өз дауыстарын беретіндіктерін жеткізді.