Шәмшат Төлепова атындағы аудандық мәдениет үйінде Қазақстан Республикасының Конституциясы күніне орай салтанатты іс-шара өтті. 

Мерекелік іс-шара сахна төріне Мемлекеттік Тудың енгізілуімен және Мемлекеттік Гимннің орындалуымен басталды.

Мұнан соң аудан әкімінің міндетін уақытша атқарушы Шыңғыс Әбділәмитұлы көпшілікті Конституция күнімен құттықтап, Ата Заң – елдіктің негізі, егемендіктің нышаны екенін айтып өтті.

– Ата заңымыз – елдік пен егемендіктің алтын діңгегі, өрлеу мен жаңғыруға жол бастаған еліміздің басты құжаты. Ата Заң талаптарының орындалуы – мемлекет дамуы мен қоғамдағы азаматтық келісімнің негізі. Заңның қағидаттарына сүйене отырып, аудан тұрғындарының тұрақты дамуына жағдай жасаймыз, азаматтардың әл-ауқатының жақсаруын қамтамасыз етуге ұмтыламыз, – деді Ш. Сыдықов.

Одан кейін, шарада ауданның әлеуметтік-экономикалық дамуына сүбелі үлес қосып жүрген сала қызметкерлері марапатталды.

Мерекелік іс-шара соңы аудан өнерпаздарының концерттік бағдарламасына ұласты. Рухты көтеретін патриоттық әндер шырқалып, жиналған көпшілікке мерекелік көңіл-күй сыйлады.