qarmaqshy-tany.kz Бүгін Шәмшат Төлепова атындағы аудандық мәдениет үйінде 1 наурыз – Алғыс айту күніне орай салтанатты, мерекелік іс-шара өтті.

Мерекелік іс-шараға аудан әкімінің орынбасары Жұлдызхан Байназарұлы қатысып, қасиетті Қармақшы елінің ауызбіршілігі мен ынтымағы айрықша көрінетінін жеткізе келе барша жиналған жұртшылықты алғыс айту күнімен құттықтады.

Сондай-ақ, ауданымыздың әлеуметтік-экономикалық, мәдени-рухани дамуы жолында адал еңбек етіп жүрген құрылысшыларға, дала дихандарына, ұлағатты ұстаздарға, ақ халатты абзал жандарға, мәдениет саласы қызметкерлері мен жыршы-жырауларға, тәртіп сақшыларына, өрт сөндірушілерге, коммуналдық сала мамандарына, еңбек адамдарына және ауданның әлеуметтік-экономикалық дамуына өлшеусіз үлесін қосқан ардагерлерге Қармақшы тұрғындары атынан шексіз алғысын білдірді.

Одан соң, ауданның қоғамдық-саяси өміріне белсенді қатысып, әртүрлі салада табысты еңбек етіп жүрген сала мамандарын аудан әкімінің алғыс хатымен марапаттады.

Салтанатты іс-шара әрі қарай аудан өнерпаздарының арнайы дайындаған мерекелік концерттік бағдарламасымен жалғасып, жиналған көрермендерге мерекелік көңіл күй сыйлады.