Баба ұрпағы бас қосты

«Батыс Еуропа – Батыс Қытай» автожолының бойында, Қазалы ауданына қарасты Байқожа ауылының төрінде Дөсек бабаның кесенесі бар. Бұл кесене қазақ өлкесін ен жайлаған баба ұрпақтарының қолдауымен салынған. Бабасын ұлықтаған ұрпақ жыл сайын бас қосып, ас береді. Биыл да бұл үрдіс өз жолынан жаңылмады.

Жақында аталған аймақта еліміздің Астана, Алматы, Ақтөбе, Шымкент, Қызылорда, Жамбыл қалалары мен шеткі елдерден баба ұрпақтары жиналды. «Ағайын тату болса, ас көп» деп қазақ атам бекер айтпаса керек. Перзенттік парызды өтеу мақсатында жержерден жиналған ағайын бабаға арнап ас беріп, спорттық жарыс ұйымдастырды. Жиында ауданның құрметті азаматы Жақсыбай Жәкеев сөз бастап, елге тілегін арнады.

– Қазақта «Адам ұрпағымен көрікті» деген жақсы сөз бар. Бас қосуға бабамыздың ұрпағы болып жиналып отырмыз. Бұл жиынды 2000 жылы қозғасақ, араға төрт жыл салып істі қолға алдық. Міне содан бері бірлігіміз ажырамай келеді. Дөсек атамыз кезінде қыста Байқожа аймағына, жазда Арқаға көшіп қонып жүргесін алғашқы белгісін осында тұрғыздық. Атамыздың ұрпағына айтып кеткен өсиеті бар. Ол «Мені ана дүниеде тыныш жатсын десеңдер ешқашан бөлінбеңдер, бірбіріңмен қыз алыспаңдар. Құдайдан ұрпағымның тазалығын сұраймын» деп айтып кеткен. Қазір 17 атаға келсек те әлі қыз алысып, қыз берген емеспіз. Біздің беріктігіміз осында, – деді ел ағасы.

Абайдың әкесі Құнанбай Меккеде мешіт салғанда Дөсек баба қол ұшын берген екен. Бүгінде бабаның ұрпақтары Қазақстанның түкпіртүкпіріне қоныс тепсе, сонымен қатар Өзбекстан, Ресей, Италияға дейін тарап жатыр. Кешегі басқосуда алыс жолды артқа тастап Ресейден, Өзбекстаннан ұрпақтары келді.

Кездесуді ұйымдастырған қызылордалықтар өздерінің дәстүрі бойынша эстафетаға айналған қолшоқпарды алматылық ағайындарға тапсырып, келесі басқосу Жетісуда өтетінін айтты. Жиынның соңы спорттық шараға ұласып, ерлер жағы қол күресіп, арқан тартысты.