Оқу жылын қорытындылады
Аудандық білім бөлімінің басшысы Гүлзира Абдазиеваның қатысуымен биылғы оқу жылының қорытындысы негізінде білім саласының өзекті мәселелерін талдауда кезекті кеңейтілген алқа мәжілісі өтті.
Мәжіліске аудандық білім бөлімінің қызметкерлері, мектеп директорлары мен есепшілер және Байқоңыр қаласы, Төретам және Ақай, өзге де шалғай елді мекендердің мектеп директорлары ZООМ платформасы арқылы онлайн қатысты.
Күн тәртібінде білім беру ұйымдары бойынша ҰБТ-ға және «Алтын белгіге» үміткерлердің дайындығы мен оқу жылын аяқтау, қорытынды аттестаттау жұмыстары пысықталды. Сондай-ақ білім беру ұйымдарындағы жетім және ата-анасының қамқорлығынсыз қалған балаларды қорғаншылыққа алу жұмыстарының есебі және мектептерде оқушылар үшін жасалынып жатқан жазғы демалыстың ұйымдастырылуы мен жүргізілуі, мемлекеттік сатып алуға байланысты жұмыстар мен «Цифрлық ұстаз» жобасы туралы атқарылып жатқан жұмыстар барысы тыңдалды.
Талқыға түскен мәселелерге білім бөлімі басшысы арнайы тоқталып, жүргізілген жұмыстарға жан-жақты талдау жасады.
Жиын соңында Гүлзира Мәжитқызы баяндамашылар тарапынан ұсыныс ретінде айтылған мәселелерге шешім шығарып, білім беру ұйымдарының басшыларына жазғы оқушылардың демалысын тиімді әрі қызықты өткізуіне бар жағдай жасау керегін және олардың өмір қауіпсіздігін басты назарда ұстауын қатаң тапсырды.
Сонымен қатар білім бөлімі басшысы ҰБТ науқанында оқушыларымыздың білім бәсекесінде бәсі биік болуын атап, барша- сына сәттілік тіледі.
Ақнұр ЕРДҮЙСЕНҚЫЗЫ
