Жазғы «Жас толқын» аулалық клубының ашылу салтанаты өтті

Қармақшы ауданының оқушылар үйінде 1 маусым Халықаралық балаларды қорғау күніне орай «Алтын балалық шақ» декадасы аясында «Жас толқын» аулалық клубының ашылуы мерекелік іс-шара болып өтті.

Аталмыш шараға аудандық білім бөлімінің басшысы Абдазиева Гульлзира Мажитқызы, аудандық білім бөлімінің әдіскері Тоқшылықова Ақтолқын Каналбекқызы және оқушылар үйінің ардагер ұстазы Мырзабаев Төлеш ағай қатысып, алдымен «Әлем бала көзімен» тақырыбында оқушылардың асфальтқа және қағаз бетіне өз қиялдарын бейнелеген суреттерін тамашалады.

Ойынға жаны құмар балғындар үстел ойындарынан түрлі қызықты ойындар көрсетсе, «Robo kids» үйірмесінің мүшелері «Техно құбылыс» тақырыбында роботтар көрмесімен таныстырды. «Шебер қолдар» үйірмесінің шеберлері саз балшықтан құмыра жасап көрсетті.

Содан кейін ғимарат ішінде «Ойы бөлектің жолы бөлек» тақырыбында дойбы сайысы мен «Жұлдыз бол!» интерактивті ойынына куә болды. Кеш қонақтары балғын бүлдіршіндерді мерекелерімен құттықтап, «Жас толқын» аулалық клубының алдағы жұмысына сәттілік тіледі. Мерекелік шара өнерпаздардың ән биімен жалғасын тапты.