Батысқа көмек қолын созған батыр бала

Биылғы жыл басы еліміз үшін оңай басталған жоқ. Ашығын айтқанда табиғаттың тосын мінезімен бетпе-бет келіп, оған қарсы әрекетпен алдын алуда бас көтермей келеміз. Қазір баршамызға белгілі болғандай еліміздің біраз өңірлерін су басты. Елдегі жомарт жандар қолдан келгенін аямай апат болған аймаққа көмектерін үздіксіз жіберіп жатыр.

Ауданымызда Жастар ресурстық орталығынан гуманитарлық көмек көрсету пункті ашылған болатын. Күні кеше сол орталыққа жинаған қаражатын алып кішкентай бала келіпті. Батыс өңіріне гуманитарлық көмек қолын созуға келген баланың есімі Дәулет Сымбатұлы.

Ол бүгінде Жосалы кентінде орналасқан №26 орта мектебінің мектеп алды даярлық тобында оқиды. Төтенше жағдайдан зардап шеккен ел тұрғындарына өзі жинап сақтаған қаржысын Дәулет орталық қызметкерлеріне табыстады.