«Көп оқу – зиялылық белгісі»
qarmaqshy-tany.kz Қазір ақпараттық технология дамыған заманда кей адамдардың көкірегінде қағаз бетіне басылып шығатын газет-жорналдардың болашағы бар ма деген сауал басым. Себебі ғаламдағы өзгерістер мен жаңалықтарды, керек ақпараттарды әлеуметтік желі арқылы білуде. Көпшіліктің «ғаламтор алысты жақындатады, байланысты жеделдетеді» дейтіні сол. Алайда желідегі жалған ақпаратқа алданып, опық жегендер де аз емес. Сол үшін шынайы жаңалықтарды газет бетінен іздеп оқитын оқырмандардың бүгінде қатары сирей қойған жоқ.
Кент тұрғыны Серік Сырымбаев аудан айнасын үзбей алып тұратын оқырманның бірі. Қазіргі таңда жеке кәсіпкер. 1995 жылдан бері кентте такси қызметімен айналысып келеді. Басылымға деген оң көзқарас қалпынан әлі де айнымағанын бізбен әңгіме барысында жеткізді.
– Жалпы ең бірінші газетті халықты сауаттандыратын бірден-бір ашық құрал деп есептеймін. «Өзі – бір күндік, сөзі – мың күндік» болатын газет-жорнал түсінген адамға ақпараттың қайнар көзі, таусылмас құнды қазына. Қазір байқасаңыз қоғамда тілдің шұбарлануы белең алып барады. Сөзді толық айтпау, қысқа жауап беру, дұрыс сөйлемеу екінің бірінде бар. Оған себеп қазіргі жастардың кітап, газеттерді оқымауынан. Мысалы, кез келген басылым бетінен мақаланың қалай болса солай толық жазылмай салынғанын көріп оқыдыңыз ба? Әрине жоқ. Міне, газетте әрбір сөзің, ақпаратың шынайы анық жазылады, – дейді Серік ағамыз.
Газет – журналистердің үздіксіз ізденісі, табанды еңбегі. Ел азаматтарының ізгі істері мен қоғамдағы өзекті мәселелер жайында оқырманға көрнекі жеткізеді. Бұл турасында Серік ағамыздың да ойы бізбен бір арнада тоғысқандай.
– Аудандық газетті оқығанда іштей баға беріп отырамын. Журналистердің еңбегін бағалаймын. Кентіміздегі жаңалықтарды оқып, оң өзгерістерге қуанып, қолдап отырамыз. Көлік жүргізгеннен кейін жол қауіпсіздік ережелеріне қатысты мақалалардың көп болғанын қалаймыз. Біздің жасымыз есейгесін ғаламтор ақтарып жаңалық іздегеннен, басылым беттерінен оқыған әлдеқайда жақсы. Көп оқу – зиялылықтың белгісі, – дейді ол.
