Заман ілгерілеген сайын ақпараттық құралдың дами түсетіні сөзсіз. Бүгінде әлеуметтік желінің дәурені артып, ел-жұрт шұғыл жаңалықпен дер кезінде кез келген байланыс құралы арқылы қауышуда. Алайда газет бетінен ақпараттарды оқығанды тиімді көретіндер де бар. Соның бірі – аудандық төл басылымның тұрақты оқырманы Болатбек Алманов.

Болатбек ағамыз зейнеткер. Алпыстың бел ортасына келсе де көңілі сергек. Газеттің әр саны келеді-ау дегеннен көшеге елеңдеп, пошта жәшігін қараумен болады екен.

– «Қармақшы таңын» үзбей оқитын оқырманның бірімін. Жалпы газетке деген құрметім мен қызығушылығым жоғары. Тілшілердің тың тақырыпта қалам тербегенін әркез бағалап отырамын. Соңғы уақытта жақсы дүниелерді жарыққа шығарып жүр. Аудан жаңалықтары мен әр ауыл жайлы жазылған кең көлемді мақалаларды оқып, өзім көзбен көргендей сезінемін. Басылым бетіне барлық сала қамтылып отырады. Газет таратушылар да осы төл басылымға деген ынтызарлығымды ескеріп, уақытылы жеткізіп отыруға тырысады, – дейді аудан тұрғыны.

Кейіпкеріміз газетті оқып қана қоймай, жаңалықты үй ішімен бөлісіп отыратын болса керек. Үйдегі анамыз да отағасының газет-журналға деген ерекше ықыласын ескеріп, өзі жоқта ешкімге қол тигізбей алып қоятынын жасырмады.

– Аудандық басылымды отбасымызбан оқимыз. Бірақ жолдасым газетті бірініші қолға алғаннан кейін міндетті түрде жаңалығымен бөліседі. Немерелері де атасының газет оқитын әдетін біліп, олар да қолынан тастамай ұстап жүреді, – дейді отанасы Орынкүл.