Баспасөзбен біргеміз!

qarmaqshy-tany.kz Қазір ақпарат алмасудың заманауи тәсілдері біздің өмірімізге дендеп кетті. Айтылған ақпарат көзді ашыпжұмғанша сол мезетте-ақ ғаламтор, түрлі сайт пен әлеуметтік желілер арқылы жаһанға тарап жатыр. Алайда оның шынайылығына ешкім кепіл бере алмайды. Мен ең бірінші газетті осы қыры үшін жоғары бағалаймын. Сонымен қатар, интернет сайттан, әлеуметтік желіден оқығаныңды тез ұмытып қаласың. Ұялы телефон да көзді тым шаршатып жібереді. Монитордан оқыған мақала мен бояу иісі сіңген қағаздан оқыған мақаланың әсері екі бөлек.

Бұл ретте технология жағынан дамыған елдердің өзінде күніне миллиондаған тиражбен шығатын газеттер барын ескеру керек. Сол мемлекеттер газеттерін неге жауып тастамайды? Олар оған бармайды. Өйткені онда газет оқу мәдениеті қалыптасқан.

Біз де осы газет оқу мәдениетін жоғалтып алмауымыз қажет. Мұнда қаншама адамның үздіксіз ізденісі, табанды еңбегі бар. Әрі газет арқылы тәрбие бере аламыз. Түсінген, ұғынған жанға баспасөз де мықты тәрбие құралы. Мәселен, жетістікке жеткен адам туралы мақаланы оқып, сондай болуға ұмтылуға болады. Ал ой салар әңгімелерден жамандықтан жиреніп, жақсылықты үйрену ләзім. Жалпы газет, баспа бетіне үңілетін жанның көкжиегі кең, танымы терең болады. Сондықтан да аудан айнасының орны бөлек. Біз әрдайым аудан айнасымен біргеміз. Ұжыммен бірге ғасырға жуық қызметі бар төл басылымның тұрақты оқырмандары бола бермекпіз, яғни әрдайым баспасөзбен біргеміз.