Иә, бүгінде ауданымыздағы кәсіпкерлікке бет бұрған тұрғындарға қайтарымсыз грант негізіндегі қаржылар, жеңілдетілген несиелер бөлу жұмыстары қарқынды жүргізіліп келеді. Адалдық пен ерінбей еңбек етуді мақсат еткендер шағын кәсіптен-ақ көктеп, көгеріп отыр. Сондай жастың бірі – Ақай ауылының тұрғыны Талғат Жасанбаев.

Оның инновациялық жобасы көпті тәнті етеді. Тың кәсіпті қолға алған жас кәсіпкер күріш таяқшаларын өндірумен айналысады. Дүкендерде сатылатын кәнігі «кукурузды» білесіз ғой. Ол жүгеріден жасалса, бұл күріштен дайындалады. Дәмі де ерекше, тіл үйіреді. Бұл бүлдіршіндердің диабетін болдырмауға, тілі уылып кетпеуіне септігін тигізеді. Қазіргі таңда өнім біршама облысқа экспортталуда. Атап айтар болсақ, Төретам, Ақай елді мекендері, Қызылорда қаласы мен Шалқар аудандарына сатылып жатыр.

Өнімді күріш жармасынан дайындайды. Бірінші кезекте күрішті қажетті ылғалдыққа келтіріп алады. Мұнан соң экструдтау процесі жүргізіледі. Кейіннен дәмдеуіш қосып, дайын өнімді қаптауға жібереді.

Талғат Болатбекұлы «Жиеней» атымен жеке кәсіпкерлігін ашып, бірнеше адамды жұмыспен қамтып отыр. Күріш таяқшалары жасалатын шағын зауытта Есбол, Төребала техник қызметінде істесе, Елдос – қаптаушы, Мәуе – тазалаушы, Айгерім – заңгер болып жұмыс істейді. Бұл өнім көпшілік сұранысына ие болып келеді.

Қазіргі жастар бизнеске үйір. Әсіресе шағын және орта бизнестен бақ іздейтіндер көп. Әлбетте, бұл жақсылықтың нышаны. Өйткені олар бизнеске үлес қосу арқылы елдің экономикасын демеп отыр. Дамыған елдерде экономиканың негізгі тірегі біздегідей шикізат емес, бизнес екенін ескерсек, жастардың бұл қадамы құптауға тұрарлық. Ебін тауып әрекет етсе, кәсіпті дөңгелетіп әкетуге болады. Әркім тек өзіне ыңғайлы, бейіміне қарай еңбек етсе болғаны.