qarmaqshy-tany.kz Кеңес әскерлерінің Ауғанстан жерінен шығарылғанына 34 жыл толып отыр.

Атаулы күнге орай кент орталығындағы «Жастар» саябағында Ауған соғысы ардагерлеріне тағзым ету, еске алу іс – шарасы өткізілді.

Ең алдымен саябақта орналасқан ескерткішке гүл шоқтары қойылып, соғыс кезінде қайтыс болған боздақтарға құран бағышталды.

Тағылымды іс-шараға аудан әкімінің орынбасары Ж.Ерқосаев, аудандық ардагерлер кеңесінің алқа мүшесі Қ.Есдәулетов, Қармақшы аудандық қорғаныс істері жөніндегі бөлім басшысының міндетін атқарушы У.Балмановтар қатысты.

Одан соң, ауған соғысы ардагерлері аудан әкімі Жандос Еркінбектің қабылдауында болды.

Аудан басшысы ауған жеріндегі сұрапыл соғыстан елге аман-есен келіп, бейбіт күннің батырлары атанып, ауданымыздың дамуына өз үлестерін қосқан ардагерлерге құрмет көрсетіп, олардың қаһармандыққа толы қайсар ерліктері бүгінгі жас буынға үлгі – өнеге болып қала беретінін жеткізді. Сонымен қатар, бірқатар жауынгер ардагерлерге алғыс хаттар және ауған соғысында қаза болған жауынгерлердің отбасына естелік сыйлықтар табыстады.

Кездесу барысында Вьетнам соғысының ардагері И.Бисенов және аудандық Қоғамдық кеңес төрағасы Ә.Құлдүйсенов ізгі лебіздерін білдірсе, аудандық Ауғанстан және аймақтық соғыс ардагерлері кеңесінің төрағасы А.Ерманов аудан басшылығына ризашылығын білдірді.