qarmaqshy-tany.kz Қармақшы ауданы бойынша аудандық білім бөліміне қарасты №199 орта мектебінде «Еңбегімен ел таныған» тақырыбында аудан, ауыл кәсіпкерлерімен кездесу кеші өтті. Келелі кездесу кеші мамандық таңдау кезеңінде тұрған оқушыларға бағыт - бағдар беріп, дұрыс жол таңдауына ықпал ету мақсатында ұйымдастырылып, еңбек етудің адам өміріндегі орнын сезіндіру арқылы оқушылардың қоғамдағы өзгерістерге назарын аудара отырып, азаматтық позициясын қалыптастыру болатын.

Кездесу кешіне еңбегімен ел арасында танылып жүрген жеке кәсіпкерлер, сала мамандары және мұғалімдермен мектептің 7-11-сынып оқушылары қатысты.

Кездесу барысында арнайы тренингтер мен мектеп оқушыларының әдеби –сазды қойылымдары қойылып, «Мамандықты қалай таңдауға болады?», «Сұрақ бізден, жауап-сізден» тақырыптары аясында қонақтармен ашық сұхбаттар жүргізілді.

Сондай-ақ, кеш қонақтарынан арман-мақсаттың орындалуы үшін ең алдымен еңбектене білудің қыр-сыры жайлы келелі ойлар айтылып, оқушылардың келешек өмір жолын таңдауда бағыт-бағдар болатындай пайдалы кеңестер берілді.