Орталық алаңда Аяз ата, Қарша қыз сыйлық берді

qarmaqshy-tany.kz  Бүгін, орталық алаңындағы жаңажылдық шырша жанында Жосалы кенті әкімінің мерекеге арналған ауқымды ертеңгілік іс-шарасы болып өтті.

Іс-шараға тұрмысы төмен, аз қамтылған 30 отбасының балалары мен көше тазалаушы 70 жұмысшы мен балалары шақырылды.

Жосалы кентінің әкімі Шыңғыс Әбділәмитұлы мерекелік құттықтау сөз сөйлеп, жыл көлемінде аудан орталығында атқарылған ауқымды жұмыстар туралы баяндап, кенттің тазалығына, оның көркеюуіне еселі еңбектерін қосқан көше тазалаушы жұмысшыларға алғыс айта отырып, бірқатарына Қармақшы аудандық мәслихат хатшысы Ә.Қошалақовтың, «AMANAT» партиясының Қармақшы аудандық филиалының атқарушы хатшысы Д.Бухановтың және Жосалы кентінің әкімі Ш.Сыдықовтың арнайы «Алғыс» хаттарын табыстады.

Бұдан кейін Жосалы кенті Ардагерлер кеңесінің төрағасы Е.Ұзақбаев, кент ардагерлері Ш.Құндақбаев, Ә.Ұзақбаевтар жиналған қауымды құттықтап, жылы лебіздерін білдірді.

Ал, ертегі кейіпкерлері мен Аяз ата, Қаршы қыз балалармен бірге ойнап, сыйлық үлестіріп, мереке көркін қыздырды.

Мерекеге қатысқан ата-аналар мен балалар ұйымдастырушы Жосалы кенті әкімшілігінің ұжымына шынайы алғыстарын айтып, көтеріңкі көңіл-күймен тарқасты.