Көше тазалықшыларына құрмет көрсетілді

Үстеріне сары желетке киіп, көше бойын тазалап жүрген адамдарды жұрт күнде көре бергеннен кейін бе, елей бермейді.

Бұл біздің көше тазалығын жасайтын жұмысшыларымыз. Олар қыста қар күреп, көктемде талдарды әктеп, арық тазалап, аптап жазда көше сыпырады. Дегенмен, осы тынымсыз еңбек қандай құрметке болса да лайық!

Осы ретте, бүгін Жосалы кентінің әкімі Шыңғыс Әбділәмитұлы көше тазалығына жауапты жұмысшыларды орталық алаңда, жасыл шырша жанында Жаңа жыл мерекесімен құттықтап, жыл көлемінде атқарған жұмыстарына алғыс айта отырып, мерекелік сыйлық жасады.

Жұмысшы аға-апаларымыз еңбектерінің ескерілгеніне шын жүректен рахметтерін айтып, үйлеріне көтеріңкі көңіл-күймен тарқасты.