Тәрбие отбасынан басталады
qarmaqshy-tany.kz Аудан әкімінің орынбасары Жұлдызхан Ерқосаевтың төрағалығымен әкімдік жанындағы кәмелетке толмағандардың істері және олардың құқықтарын қорғау жөніндегі аудандық комиссияның кезекті отырысы өткізілді.
Күн тәртібінде өзекті деген бірнеше мәселе қаралды. Алдымен аудандық полиция бөлімінің Жергілікті полиция қызметі бөлімшесінің бастығы, полиция майоры Ербол Палжанов кәмелетке толмағандар арасындағы құқық бұзушылықтың ахуалы, аудан бойынша жайсыз отбасы санатына жататын отбасылар туралы ақпар берді. Сондай-ақ олармен бөлімнің Ювеналды полиция тобының УПИ-ры және Әйелдерді зорлық-зомбылықтан қорғау тобы қызметкерімен атқарылып жатқан жұмыстар туралы өз баяндамасында кеңінен тоқталып өтті. Мұнан соң аудандық аграрлы-техникалық колледждегі білім алушылардың оқу барысы мен тәртіп мәселесі туралы колледж директоры Бауыржан Сайдулла хабарласа, ОПД-нің жергілікті полиция қызметі басқармасының ұсыныс хаты туралы аудандық білім бөлімінің әдіскері Ақтолқын Тоқшылықова мәлімдеді. Отырыста қаралған мәселелерге орай комиссия мүшелері өздерінің ұсыныс-пікірлерін ортаға салды. Комиссия төрағасы жалпы осы бағыттағы жұмыстарды жандандыру керектігін тапсырды.
