Марал ишан мазарына тазалық жұмыстары жүргізілді

«Ой бренд» қоғамдық қорының және «Demeu» еріктілер тобының ұйымдастырумен Марал ишан мазары аумағына тазалық жұмыстары жүргізілді. Мазар аумағын тазарту, көмек көрсету және қолғабыс ету шараларына волонтерлар мен белсенділер жұмыла тартылды.
«Жүз шайыр шыққан мекенде қасиетті тұлғаларымыздың көп екендігі белгілі. Қазіргі өсіп келе жатқан ұрпаққа ұлттық құндылықтарымызды дәріптеуді қолға алуға тиіспіз. Болашақтың тізгінін ұстайтын жастар өз өңірлерінде қандай тұлғалардың мекен еткенін, халыққа қандай қызмет жасағанын білуге тиіс.» - деді «Ой бренд» қоғамдық қорының Президенті Сабыржан Бахытжанұлы.
«Волонтерлар корпусын жандандыруда ұлттық мұраны сақтау бағытына ерекше назар аударуға тиіспіз. Ауданымызға қарасты жерлерден тарихи тереңде жатқан қаншама тарихи орындарды табуға болады. Өңірінің тарихын біліп өскен жастар туған елге аянбай қызмет етеді. Жастардың, оның ішінде оқушыларға тарихи орындарды таныстыру, экскурсия жасату және белгілі мүмкіндіктерді пайдалану арқылы асыл мұраға бағытталған бейресми білімді үздіксіз беруді ұсынамын.», - деді Qosyl командасының мүшесі, волонтер Нұрасыл Жасұланұлы.
Аталмыш жоба, Қазақстан Республикасы Ақпарат және қоғамдық даму министрлігі Азаматтық бастамаларды қолдау орталығы «Даналық» қоғамдық қорының «Birgemiz: Asyl mura» жобасының шағын гранты аясында іске асырылуда.