ЖҮЛДЕМЕН ОРАЛДЫ
Жақында Оңтүстік Қазақстан облысы, Арыс қаласында 2004-20005 жылдары туған жасөспірім былғары қолғап шеберлері арасында бокстан Қазақстан Республикасының кезекті чемпионатына іріктеу, яғни Алматы, Жамбыл, Оңтүстік Қазақстан мен Қызылорда облысы шаршы алаң иелерінің қатысуымен аймақтық жарыс өтті.
Оған аталған аймақтарда өз салмақтары бойынша үздік деп танылған 200-ге жуық спортшы қатысты.
Тартысты да қызықты сәттерге толы болып өткен жарыстың нәтижесінде Сыр бойы құрама командасы жоғары дәрежеде өнер көрсетіп, елге абыроймен оралды. Оның ішінде, жерлесіміз, №15 мамандандырылған олимпиадалық резервтің балалар мен жасөспірімдер мектебінің жаттықтырушысы Жандос Топаевтың шәкірті, №26 орта мектептің оқушысы Асылхан Аманжолов өз салмақ дәрежесінде жүлделі ІІ орынды иемденді. Сондай-ақ, жерлесіміз осы жарысты ұйымдастырушылар тағайындаған «Жеңіске деген жігері» үшін номинациясымен марапатталды.
Енді, Асылхан ағымдағы жылдың мамыр айында Жаңақорған кентінде өтетін ҚР-сы чемпионатына қатысады.
Нұрбай ӘБІЛАХАТҰЛЫ,
«Қармақшы таңы».
