Қарбаласқа толы жұмыс аптасы басталып кеткен. Редакцияға телефон қоңырауы түсті. Амандық-саулық сұрасқан соң кент тұрғыны газеттің кешігіп жатқанын айтты. Газеттің кешігуіне себеп қандай? Таратушылар нендей жағдайды бастап өткеріп жүр? Мәселенің мән-жайын білмекке рейдке шыққан болатынбыз. Таңертеңгі сағат 9.00-ді көрсетіп тұр. Қоңыр күздің солқылдаған суық күні. Қыстың қытымыр аязы да түсіп үлгірді. Әдеттегідей редакцияның газет тасымалдау бөліміне газеттер келіп жатты. Мұнда әр аптаның сейсенбі, бейсенбі, сенбі күндері газет келіп тұрады. Таратушылардың басты міндеті – үй-үйге газетті уақытылы жеткізу. Иә, қаладан "газет келді" дегенді естіп бірден таратушылар бөліміне жөнелдік. Олар "ә" дегеннен-ақ өзіне тиесілі газетті бөліп, есептеп алып жатыр. Газетті көше-көшеге үлестіріп жатқан таратушыларды біз сырттай бақылап, күтіп тұрдық.
Бір қарағанда, газетті таратып шығу оңай деп ойларсыз. Әсілі, қай жұмыстың да жеңілі жоқ. Өзіне тән қызығы мен қиындығы бар. Шынтуайынтында газет таратушының кезігер кедергісі көп. Жұмысы да қым-қуыт қамасқан қарбаласқа толы.
Сағат 9.30. Біз ырғақты тіршілігі көзге іліне бермейтін, жауапкершілігі мол, ісі тыңғылықты, көпке үлгі, газет таратушы Арыстанбек Қанағатовтың соңына ілестік. Арқаға қара сөмкені асынып, ағамыз велосипедіне мініп алды. Алғашқы бағытымыз – Өміров көшесі. Бірді-екілі үйге газетті апарған соң абалап үрген иттің дауысы қатты шықты. Үйдің маңына келіп, газетті пошта жәшігіне салғанша әлгі иттің үрісі үдеген жоқ. Анадайдан қарап тұрған біздің өзіміз қорқақтап тұрдық.
– Мына тұрған үйдің иті үріп көшеден жүргізбейді. Бүгін байлап қойыпты. Әйтпесе газетті пошта жәшігіне салғызбай біраз әуреленетінмін. Уақытты да ұстайды, – дейді газет таратушы Арыстанбек Қанағатов.
Кент тұрғындары Арыстанбек ағайдың жұмысқа деген жауаптылығына тәнті болып, ризашылығын білдіреді. Газет келген бойда күннің ыстық-суығына қарамай таратып жүретінін көзіқарақты оқырман жақсы білетін болар.
– Газетіміз уақытылы келіп отыр. Таратушыларға үлкен алғысымды айтамын. Рас, кей тұрғындар итін бос жібере салады. Әрине, көшеде иттен жүре алмай әбігерге түсеміз. Таратушыны да жақсы түсінемін. Ит қауып жазым болса қайтпек керек?! – дейді кент тұрғыны Өміркүл Сатыбалдиева.
11.00. Күн көзі көрінгенмен ызғары басым. Ал таратушы ағамыз әлі газет таратып жүр. Кей үйлерде тіпті пошта жәшігі жоқ. Мұндай жағдайда газетті есікке қыстырып кетеді. Сол себепті оны уақытылы алу керек.
– Бірде бір жеті ауылда болмай қалдым. Кетерде газетімді жинап қоярсыз деп таратушыға ескертіп кетіп едім. Сөзімді жерге тастамай, келген бойда барлығын әкеп берді. Аудандық басылым болған соң газетті асыға күтемін, – дейді А.Бақытқызы.
Түскі үзілістің уақыты да таяп қалды. Алда әлі 200-ге жуық үй бар. Оның барлығын кешке дейін үйді-үйге тарату керек.
Күн қысқарып келеді. Дегенмен рухани жан азығы саналатын мерзімді басылымдарды әрбір таратушы ауа-райының қолайсыздығына қарамай оқырманға уақытында жеткізуге аянып қалмауда.