Ерлік – ешқашан ұмытылмайды. Ел басына күн туғанда қаруын сайланып, аттанбаған азаматтар кем де кем шығар. Ұлтының ұйытқысын бұзбаған, тыныштығы мен берекесінің бекемдігін сақтаған жандар аз емес.

Биыл Кеңес әскерлерінің Ауғанстан жерінен шығарылғанына 32 жыл толды. Осы орайда Иіркөл ауылындағы №106 мектептің алғашқы әскери даярлық пәнінің мұғалімі Ж.Ахметовтің ұйымдастыруымен «Естен кетпес ерен ерлік» атты Ауған соғысының ардагерлерімен кездесу кеші өтті. Ерліктің қай-қайсысы да айтып өтпеуге болмайтыны секілді осы жолда жанкештілік көрсетіп, Ауған соғысында ерлігімен танылған азаматтар Асқар Ерманов, Қуаныш Айқұдықов, Болат Тәтбеков, Қайырбек Естов, Ахметбек Арықбаев ағаларымызбен сұқбат жүргізіліп, майдан барысында қиыншылықтарымен бөлісті. Ұрыс алаңында көрсеткен ерліктері бүгінгі ұрпаққа толассыз үлгі, оларды патриоттық сезімге баулуға, Отанға деген риясыз сүйіспеншілікке тәрбиелеуге бағытталды. Ауғанстан соғысында ерлікпен қаза тапқан интернационалист жауынгер Р.Доспановтың рухына Құран бағышталып, гүл шоқтары қойылды. Кездесу барысында оқушылар ардагерлермен сұқбаттасып, мультимедиялық форматта слайд, видеороликтер көрсетіліп, кеш қонақтарына оқушылар өлең шумақтарын тарту етті. Еңселі еліміздің ертеңі болар бүгінгі ұрпақтың бойынан нақ осы батырлардай рухтың табылатынына кәміл сенеміз. Еліміз бен жеріміздің бақытына туар айбарлы да айдарлы ұлдарымыз көп болғай.