ТҰЗДЫ АРТЫҚ ТҰТЫНУДЫҢ ЗИЯНЫ

Тұз адам ағзасына белгілі бір мөлшерде қажет. Алайда оны шамадан тыс пайдалану денсаулыққа кері әсер етеді. Дүниежүзілік денсаулық сақтау ұйымы ересек адамға тәулігіне 5 грамнан аз тұз тұтынуды ұсынады. Бұл мөлшер тағам дайындау кезінде қосылатын тұзбен қатар, дайын өнімдердің құрамындағы тұзды да қамтиды.

Тұзды шамадан тыс тұтыну ең алдымен артериялық қан қысымының жоғарылауына әсер етеді. Қан қысымының ұзақ уақыт бойы жоғары болуы жүрек-қантамыр ауруларының, соның ішінде жүрек аурулары мен инсульттің даму қаупін арттырады. Сонымен қатар ағзада сұйықтықтың іркілуіне ықпал етіп, жүрек пен бүйрекке қосымша салмақ түсіруі мүмкін.

Қазіргі таңда тұздың едәуір бөлігі тағамды дайындау кезінде ғана емес, дайын және өңделген өнімдер арқылы қабылданады. Шұжық өнімдері, консервілер, тұздалған және ысталған тағамдар, кейбір нан-тоқаш және дайын тағам түрлерінің құрамында тұз мөлшері жоғары болуы мүмкін. Сондықтан өнім сатып алу кезінде оның қаптамасындағы тағамдық құндылығы мен құрамына назар аударған жөн.

Тұзды тұтынуды азайту үшін күнделікті өмірде қарапайым әдеттерді қалыптастыру маңызды. Тағам дайындау барысында тұзды мөлшермен пайдалану, дайын тағамға қосымша тұз қоспау, тұзы жоғары өнімдерді шектеу және тағамның дәмін табиғи дәмдеуіштер, көкөністер мен шөптер арқылы келтіру ұсынылады.

Балаларды ерте жастан бастап тұзы аз тағамдарға үйретудің де маңызы зор. Дұрыс тамақтану мәдениетін қалыптастыру – болашақта денсаулыққа байланысты қауіптердің алдын алуға мүмкіндік береді.

Тұзды толықтай алып тастау қажет емес, бастысы – оны шамадан тыс тұтынуға жол бермеу. Әр адам күнделікті тамақтану әдетіне жауапкершілікпен қарап, тұз мөлшерін бақылау арқылы өз денсаулығын сақтауға үлес қоса алады.

Дұрыс тамақтану – денсаулық кепілі. Тұзды мөлшермен тұтынып, денсаулығымызға жауапкершілікпен қарайық!