ҰЙҚЫҢЫЗ САПАЛЫ МА?

Сапалы ұйқы ең алдымен ми қызметін реттейді. Ұйқы барысында ми күндіз алынған ақпаратты саралап, қажетсізін ысырып, маңыздысын есте сақтайды. Жеткілікті әрі тыныш ұйықтаған адамның ойлау қабілеті жақсарып, зейіні мен есте сақтау мүмкіндігі артады. Ал ұйқы қанбау керісінше ашушаңдыққа, ұмытшақтыққа және күйзеліске алып келеді.

Ұйқының адам ағзасына тигізер пайдасы физикалық саулықпен де тығыз байланысты. Түнгі тынығу кезінде жүрек соғысы баяулап, қан қысымы тұрақтанады, бұлшықеттер босаңсиды. Осы сәтте иммундық жүйе белсенді жұмыс істеп, ағзаның түрлі ауруларға қарсы тұру қабілетін күшейтеді. Сапалы ұйқысы бар адам суық тию мен жұқпалы дерттерге сирек шалдығады.

Сонымен қатар ұйқы зат алмасу процесіне тікелей әсер етеді. Ұйқысы дұрыс адамда тәбет пен салмақты реттейтін гормондар теңгерімде болады. Ал түнді ұйқысыз өткізген жағдайда аштық сезімі күшейіп, артық тамақтануға бейімділік пайда болады. Бұл семіздік пен қант диабетінің қаупін арттырады.

Сапалы ұйқы – рухани тыныштықтың негізі. Жақсы ұйықтаған адам таңертең сергек оянып, өмірге оң көзқараспен қарайды. Көңіл күйі тұрақты болып, күйзеліс пен мазасыздыққа қарсы тұра алады. Ұйқы – жан мен тәннің үндестігін сақтайтын табиғи ем.

Ұйқы саласының сарапшысы Лиза Артис сапалы әрі тыныш ұйқыға мынадай пайдалы ақпаратпен бөліседі. Оның айтуынша, ұйқыны дұрыс реттеудегі ең басты фактор – тұрақтылық. Сол себепті белгілі бір уақыт режимін қалыптастырып, соны күн сайын ұстану қажет. Дегенмен маман кейде кестенің бұзылуы қалыпты жағдай екенін де атап өтті.

«Егер бір күні кеш жатсаңыз, келесі күні әдеттегі уақытта оянып, қайтадан сол қалыптасқан уақытта ұйықтауға тырысыңыз. Осылайша бір түнгі ұйқысыздық бүкіл режимді бұзып жібермейді» – дейді Артис.

Сондай-ақ маман ұйықтар алдында кемінде 20 минут бұрын смартфонды бір жаққа қойып, осы уақытты тынығуға арнауға кеңес береді. Жылы душ немесе ванна қабылдау, не жай ғана көрпеге оранып отыру ағзаны ұйқыға дайындайды. Алайда бұл бөлме тым ыстық болуы керек дегенді білдірмейді. Сарапшының айтуынша, ұйқыға ең қолайлы температура – 16-18 градус.

Бұдан бөлек, ұйқының сапасын арттыру үшін маман ауыр тағамды ұйқыға дейін кемінде үш сағат бұрын жеуді тоқтатуға және кешкі уақытта алкогольден бас тартуға кеңес береді. Оның сөзінше, мұндай әдеттер ұйқының бөлінуіне және тынышсыз өтуіне себеп болуы мүмкін.

Қорыта айтқанда, сапалы ұйқыны әдетке айналдыру – әр адамның өз қолындағы жауапкершілік. Ұйқы уақытын реттеу, түнде гаджеттерді шектеу, тыныш орта қалыптастыру секілді қарапайым дағдылар денсаулықты нығайтады. «Жақсы ұйқы – жақсы өмірдің бастауы» десек, қателеспейміз.