АДАМ ПАПИЛЛОМА ВИРУСЫ: АЛДЫН АЛУ – ДЕНСАУЛЫҚ КЕПІЛІ

Адам папиллома вирусы (АПВ) – кең таралған вирустық инфекциялардың бірі. Бұл вирус көбінесе жыныстық жолмен беріледі және көптеген адамдар өмірінде бір рет болса да АПВ жұқтырады. Дегенмен, көп жағдайда ол белгісіз өтіп, ағзадан өздігінен жойылады. Алайда кейбір қауіпті түрлері қатерлі ісікке, әсіресе жатыр мойны обырына әкелуі мүмкін.

Вирус негізінен жыныстық қатынас кезінде, тері мен шырышты қабаттардың жанасуы арқылы жұғады. Сондай-ақ сүйісу немесе тұрмыстық заттар арқылы да (өте сирек жағдайда) жұғуы мүмкін. Ең басты қауіп – вирустың ұзақ уақыт бойы ағзада «үнсіз» қалып, кейін асқыну беруі.

АПВ-ның 100-ден астам түрі бар. Олардың кейбірі теріде немесе жыныс мүшелерінде сүйел (папиллома) тудырса, қауіпті түрлері жатыр мойны, анус, тамақ, жыныс мүшелері обырына себеп болуы мүмкін. Қазақстанда жатыр мойны обыры – әйелдер арасында кең таралған қатерлі ісіктердің бірі.

АПВ-дан қорғанудың ең тиімді жолы – вакцинация. Қазақстанда 9–14 жас аралығындағы қыздарға (кейбір елдерде ұлдарға да) АПВ-ға қарсы тегін екпе салынады. Бұл жас – вакцинация үшін ең тиімді кезең, өйткені вируспен әлі кездесіп үлгермеген шақ.

Сонымен қатар:

Тұрақты және сенімді жыныстық қатынас,

Жеке гигиена сақтау,

Жыныстық жолмен берілетін инфекциялардың алдын алу,

Жыл сайын гинекологиялық тексеруден өтіп тұру (ПАП-тест) – ауруды ерте анықтап, алдын алуға мүмкіндік береді.

Адам папиллома вирусы – назардан тыс қалдыруға болмайтын індет. Оның алдын алу мүмкіндігі бар. Әр ата-ана өз баласының болашағы үшін екпені уақытылы жасатуы тиіс. Ал ересектер өз денсаулығына жауапкершілікпен қарап, тексерілу мен сақтану шараларын ұстануы қажет. Денсаулық – әркімнің өз қолында!