Жыр жұлдызы – Көшеней

Іс-шара алдымен орталық алаңда жырау Ә.Қуаңбаевтың арнау жырын тыңдаудан басталды. Одан соң сүлейлер аллеясына гүл шоғы қойылып, клуб үйінің кіреберісінде Жиенбай жырау үйірмесі шәкірттерінің жыр шашуымен «Жыр жұлдызы – Көшеней» атты облыстық ақын дар айтысының шымылдығы түрілді.

Іс-шара ел Тәуелсіздігінің 30 жылдығы аясында даңғайыр жыраулардың ұрпағы, жыршы, жырау Көшеней Рүстембекұлының туғанына – 75 жыл толуына орай ұйымдастырылды. Нысан – қазақтың төл өнерін жас ұрпаққа насихаттау және паш ету. Мерейлі мерекеге «Тұрмағамбет» ЖШС төрағасы Нұржан Айдарбекұлы демеушілік жасады.

Шымылдығы түрілген облыстық аламан айтысқа облыстың, ауданның түкпір-түкпірінен талаптың тұлпарын мінген жүйріктер қатысуға ынта білдіріп, 8 ақын келді. Облыстық айтысты аудан әкімі Қайрат Ырзақұлұлы ашып, ақындарға сәттілік тіледі.

Сайыс додасында ақындар Көшеней Рүстембековтің мәңгілік мұрасын насихаттап, шабысты шабытпен өнер көрсетті. Жұп болып шығып бір-бірімен әзілдері жарасса, ендігісінде қағытып отырып, қалың көрерменнің ду қол шапалағына ие болды. «Аламанда аты озған мәреге жетеді» дейді. Бұл сайыста қазылар алқасы әділ бағасын беріп, қате кеткен, түзер жерді сынап алды. Сонымен облыстық ақындар сайысының нәтижесі бойынша аралдық Бексұлтан Орынбасаров пен Қызылорда қаласынан келген Жамбыл Бақытәлі ІІІ орынды місе тұтса, сырдариялық ақын Мұхаметжан Мансұров ІІ орынға ие болды. Жерлесіміз Сырым Әділбеков І орыннан көрінсе, бас жүлде шиелілік Бекжан Ержігітке бұйырды. Ал ынталандыруға Бекзат Серіков, Мұханбетәлі Бекпейісов, Бекқанат Смайылұлы ілікті. Айта кеткен жөн, ауыл ағалары атынан Бекарыс Арыстановтың арнайы сыйлығы Тұрмағамбет ауылының атынан өнер көрсеткен Бекқанат Смайылұлына табысталды. Іс-шара соңында аудан әкімі жырау Бидас Рүстембековке сый-сияпат жасап, қазақы дәстүрмен шапан жапты. Одан соң барлығы естелік суретке түсіп, келесі бағыт бойынша мектеп жанынан ашылған «Сыр елі – Жыр елі» мұражайын тамашалады.