Аудан әкімі Қайрат Ырзақұлұлы, аудандық мәслихат хатшысы Әділ Үсенұлы, аудандық ардагерлер кеңесінің төрағасы Қаршыға Есдәулетов сәрсенбі күні Ақжар ауылына жұмыс сапарымен барды.

Алдымен мемлекеттік бағдарлама аясында 555 мың теңге грант алып, жеке кәсібін дөңгелетіп отырған жас кәсіпкер Дархан Дүкенбайқызының «Талап» тәтті өнімдер наубайханасының жұмысымен танысты.

Қазір шағын наубайханада 4 адам жұмыспен қамтылып, пицца, самса, бәліш және басқа да нан өнімдері дайындалып, ауылдағы дүкендерге сатылып келеді.

Әрі қарай сапар барысында аудан әкімі ауылдық клуб үйінде ауыл шаруашылығы өнімдерінің және қолөнер шеберлерінің көрмесін тамашалап, «Күміс көмей – Көшеней» атты облыстық жыршы-жыраулар фестиваліне қатысты.

Көшеней Рүстембековтің 75 жылдығына орай ұйымдастырылған фестивалді Қайрат Ырзақұлұлы ашып:

«Сыр елі – жыр елі» дегенде жыраулық өнердің туын тіккен, рухани әлемге 100 жырау сыйлаған қасиетті Қармақшы ауданының орны айрықша. Осы киелі шаңырақта Дүзбембет, Дүзбембеттен туған Жиенбай, одан туған Рүстембек, Рүстембектен тараған Көшеней мен Бидас, Көшенейден Арнұр, міне осылай атадан балаға ешбір үзіліссіз беріліп келе жатқан табиғи заңдылық таза қалпымен керуендей көшіп келеді» -деген аудан басшысы, бабадан қалған жыр аманатты жеткізуші, Сыр сүлейлерінің бүгінгі мұрагер ұрпақтарына сәттілік тіледі.

Сапар соңында ауылдағы 88 жастағы ең қарт зейнеткер, «Батыр ана» – Ерманова Халияш апайдың шаңырағына арнайы барып, хал-жағдайын біліп, ізгі лебізін жеткізді.

Халияш апай – 28 жыл аспазшы болып жұмыс жасаған. «Алтын алқа», «Күміс алқа» иегері. «Ұлы отан соғысына 70 жыл», «Ұлы отан соғысына 75 жыл», «Еңбек ардагері», «Ақжар ауылының 60 жылдығы» медалдарымен марапатталған.

Жолдасы Қадіров Мұсабек екеуі 8 бала, 40 немере 60 шөбере тараған.