28 жастағы Серікболсын Жосалының тумасы. Қазір ол туған ауданының халқына құжаттарды рәсімдеу мен оған қол жеткізуіне қызмет етеді. Яғни, аудандық халыққа қызмет көрсету орталығында маман. 2014 жылы Қорқыт ата атындағы ҚМУ-ды "Әлеуметтік жұмыс" мамандығы бойынша үздік тәмамдаған. Ал 2017 жылы осы оқу орнынан "Экономика және бизнес магистрінің" академиялық дәрежесін алған.

– Ата-анам бала кезімнен біреудің ала жібін аттама деп өсірді. Содан болар әр бастар ісімнің алдында саралап, дұрысы мен бұрысын ажыратып аламын. Одан бөлек, жан-жақты болып, әр саланың қыр-сырын білсем деймін. Сондықтан көп еңбектенемін, – дейді Серікболсын Мәденов.

Расында, ол бір саламен тұрақтап қалмаған. 2016 жылдан бері "Nur Otan" партиясы жанындағы "Jas Otan" жастар қанатының белсендісі. Аудандық жастар мәслихатының депутаты. Өзі еңбек ететін салада бірнеше рет "Айдың үздік қызметкері" атанып, бөлім басшысының алғыс хатымен марапатталған. Облыстық және аудандық "Nur Otan" партиясы филиалының және облыстық Жастар ресурстық орталығының алғыс хатымен марапатталған.

Ү.Томанов атындағы №183 орта мектептің түлегі Қармақшының белсенді жастарының бірі. Ол ауданда жастар саясатын жүйелі дамытуға өз үлесін қосуда. Басты мақсаты – ауданды дамыту.

– Туған жерге қызмет еткенге не жетсін. Дамыған заманда өскен әрбір жастан түрлі идея табылады. Менің арманым жастар ауылға келсе, ауылдың дамуына тікелей ықпал етсе. Жүйелі жоспарларын жүзеге асырып, жаңа жобаларды бастаса, – дейді кейіпкеріміз.

Оның мұндай маңызды жоспарларын жақында өткен "Праймериз" партияішілік сайлауында байқадық. Серікболсын сол сайлауда бақ сынап көрді. Ауылды дамыту мен жетілдіру жолындағы тың идея және жобаларымен бөлісті. Әсіресе ауылға қажетті сала мамандарын даярлау, жаңа өндіріс орындарын ашу мен ауданда өндірілетін отандық өнімдерді экспорттау секілді аса маңызды мәселелерді көтерді.

Бүгінде Шұғыла Нұрлыбекқызымен отау құрған белсенді жас жолдасының тарапынан қолдау мен демеу аз емес екенін жасырмады. Өмірлік серігі ол қолға алған істерге демеу болып, өз пікірін ашық білдіріп отырады. Соның нәтижесінде отбасында жан-жақты зерделенген, оң нәтижелі шешім қабылданады.